Foto: Ashyq derekkóz
Bul týraly HAMAS saıası bıýrosynyń joǵary laýazymdy múshesi Mýsa Abý Marzýk málimdedi.
«Biz Tramp ákimshiligimen baılanysqa shyǵýǵa jáne kelissózder júrgizýge daıynbyz. Buǵan deıin biz AQSh-tyń burynǵy prezıdenti Djo Baıdenniń , Tramppen nemese AQSh-tyń kez kelgen basqa ákimshiligimen baılanys ornatýǵa qarsylyq bildirgen joqpyz. Barlyq halyqaralyq taraptarmen kelissózderge ashyqpyz», dedi Abý Marzýk.
Marzýk Vashıngtonnyń Taıaý Shyǵystaǵy mańyzdy oıynshy ekenin eskersek, HAMAS úshin AQSh-pen kelissózder júrgizýdiń ózindik qajettilikke aınalǵanyn atap ótti. Sondyqtan da olar amerıkalyqtarmen kelissózderge qoldaý bildirip, bul máselege qarsylyq tanytpaıtyndaryn jetkizgen.
Aıta keteıik, seısenbi kúni HAMAS delegasııasy RF Syrtqy ister mınıstrliginiń basshylyǵymen kezdesýler ótkizgen.
Bir kún buryn Tramp palestınalyqtar Gaza sektorynan basqa jerge qonys aýdarǵannan keıin soǵystan zardap shekken aýmaqty AQSh baqylaýyna alatynyn jáne onyń ekonomıkalyq damýymen aınalysatyna ýáde bergen edi. Biraq, AQSh prezıdentiniń dál osy málimdemesi qazirdiń ózinde Taıaý Shyǵys óńirinde, sondaı-aq keıbir amerıkalyq saıasatkerler arasynda synǵa ushyrap otyr.
HAMAS-tyń resmı ókili Samı Abý Zýhrı AQSh prezıdenti Donald Tramptyń Gaza sektoryn basyp alý týraly málimdemesin «kúlkili» ári «absýrd» dep baǵalaǵan.
«Tramptyń Gazany baqylaýǵa alý nıeti týraly málimdemesi aqylǵa qonymsyz. Mundaı sıpattaǵy kez kelgen ıdeıa óńirdegi jaýlyq otyn tutandyrýǵa túrtki bola alady», dedi Abý Zýhrı.
Hamas saıası bıýrosynyń múshesi Izzat ál-Rıshk Tramptyń sózderi «Palestına máselesi men jalpy aımaq týraly túsiniksizdik pen tereń nadandyqty» kórsetedi dep málimdegen.
Saýd Arabııasy Syrtqy ister mınıstrligi palestınalyqtardy óz jerlerinen kóshirý áreketterin joqqa shyǵaratynyn aıtqan. Sondaı-aq Saýd astanasy Shyǵys Ierýsalım bolatyn táýelsiz Palestına memleketi qurylmaı Izraılmen dıplomatııalyq qarym-qatynas ornatpaıtyndyqtaryn ashyq málimdegen.
