Kitap oqý – zııalylyqtyń belgisi. Talǵamy joǵary oqyrmannyń talabynan shyǵatyn kórkem, kesek týyndylar qashannan qunarly qazaq ádebıetinde árkez az bolmaǵan. Sondaı-aq álem ádebıetiniń jaýharlarymen tanysýda aýdarma eńbekterdiń jóni bólek. Tárjimanyń tildik, stıldik qyr-syryn sheber meńgergen kánigi aýdarmashylarymyz nebir klassıkalyq týyndylardy sátimen qazaqsha sóıletti. Osy iske eselep eńbek sińirgen qalamgerdiń biri qaraǵandylyq Maral Hasen edi.
Kósemsózshi, redaktor, aýdarmashy M.Hasenniń ómir joly eldiń tórtinshi bıligi sanalatyn qazaq baspasóziniń qalyptasýy, damýymen bite qaınasyp, birge órildi. Aımaqtyń baspasóz salasynda jan aıamaı, taban aýdarmaı qapysyz qyzmet etti. Aýdandyq gazettiń qatardaǵy tilshisinen redaktorlyqqa deıingi joldy júrip ótti. Qalamy júırik jýrnalıst retinde tanyldy. Oblys ákimdiginde jaýapty qyzmette boldy. «Ortalyq Qazaqstan» gazeti bas redaktorynyń orynbasary laýazymyn abyroımen atqardy. Shyǵarmashylyq turǵyda tek Qaraǵandy óńirimen shektelmeı, birqatar respýblıkalyq, aımaqtyq bedeldi basylymdarmen de tyǵyz baılanysta boldy. Túrli jazbalary, aýdarmalary «Qazaq ádebıeti», «Jas Alash» sııaqty gazetterde úzbeı jarııalanyp turdy.
Eki tilge birdeı júırik – qazaqshadan orysshaǵa, orysshadan qazaqshaǵa irkilmeı, jeńil aýdara beretin ámbebap maman M.Hasen shyǵarmashylyǵynyń qomaqty bir bóligin kórkem, ǵylymı-tanymdyq aýdarmalary quraıdy. Kórkem shyǵarmalardan áýelide jazýshy Asqar Altaıdyń «Kıller saýysqan – Kózjendet» áńgimesin aýdardy. Bir qyzyǵy, avtorǵa aýdarmasyn «Lıteratýrnyı Kazahstan» jýrnalyna jarııalaǵan soń ǵana habarlasypty. Keıinde Dýman Ramazannyń «Kókjal», «Allanyń ámiri» shyǵarmalaryn qosqanda bes áńgimesin, «Kenesary-Kúnimjan», «Abylaı han» dramalaryn, Saıa Qasymbektiń «Kim kináli?» bastaǵan birneshe pesasyn orys tiline aýdardy.
Akademık Ebineı Bóketovtiń «Shoqannyń shýaqty shuǵylasy» atty kólemdi eńbegin, 2009 jyly «Mádenı mura» memlekettik baǵdarlamasymen úndi klassıkteri R.Naraıan, K.Chandardyń povesterin, sondaı-aq jergilikti qalamger Revaz Mahatadzeniń «Qazaqstan aspany aıasynda» romanyn qazaqshaǵa sátti tárjimalady. «Álemdik áleýmettaný antologııasy» jobasyna da eleýli úles qosyp, tarıhshy Á.Ábdiákimovtiń «Qazaqstan tarıhy» oqý quralyn, ǵylym doktory T.Sultanovtyń «Aq kıizge kóterilgender. Qazaq dalasynyń handary» ǵylymı jumysyn aýdardy.
Qalamgerdiń aýdarmashylyq qarym-qabiletin «Álem ádebıeti» jýrnaly molynan paıdalandy. Birtalaı aýdarmasy osy jýrnalda basyldy. 2015 jyly Nobel syılyǵyn alǵan belarýs jazýshysy Svetlana Aleksıevıchtiń «Soǵystyń surqy áıelge jat» kitabyn sátti aýdaryp shyqty. Avtordyń ózi: «Armanym – birqatar Nobel syılyǵy laýreattarynyń dúnıelerin toptastyryp, jeke kitap etip shyǵarý. Bul kúnde ár elden shyqqan on tórt nobelıanttyń áńgimelerin aýdaryp, tynystap otyrǵan jaıym bar. Mine, olar – Býnın, Hemıngýeı, Hımenes, Kamıý, Kavabata, Soljenısyn, Bell, Iýnson, Kanettı, G.Markes, Mahfýz, Oe, Naıpol, Pamýk. P.Koelo («Alhımık») bastaǵan nobelıant bolmasa da, óz aldaryna eren myqtylardy aýdardym. Olardyń ishinde Paýstovskıı, Zoshenko, Bıtov tárizdi myqty orystar bar», dep jazady «Aýdarma jáne aýdarmashylar haqynda» atalatyn shaǵyn maqalasynda.
Avtordyń kózi tirisinde «Júrek qanyn sııa qylǵan...», «Mazasyz kúnder», «Synyn bermes syrly sóz» kitaptary jaryq kórdi. Dátke qýat etetin bir jaı – qalamgerdiń ómirlik jary, jazǵan-syzǵandarynyń birinshi oqyrmany, synshysy, qoldaýshysy Rymbala Smaıylova apaı otaǵasy ómirden ótkeli beri tynym tappaı, onyń shyǵarmalaryn basyp shyǵarý, esimin máńgi este qaldyrý jumystarymen júıeli shuǵyldanyp júr. M.Hasenniń ómiri men shyǵarmashylyǵynan syr shertetin, shyǵarmalary, estelikter, oı-tolǵamdar toptastyrylǵan «Telegeı teńiz Maral ediń», «Jalǵasqan ǵumyr» atty kitaptardy qurastyrdy. Shyǵarmalarynyń kóp tomdyǵyn bastyryp shyǵardy. Astana, Qaraǵandy, Jezqazǵan qalalarynda, Jańaarqa aýdanynyń ortalyǵynda birneshe ádebı-kórkem keshterdiń ótýine muryndyq boldy. Astanadaǵy ulttyq kitaphanada, Qaraǵandydaǵy J.Bekturov atyndaǵy oblystyq jasóspirimder kitaphanasynda M.Hasenniń ómiri men shyǵarmashylyǵynan syr shertetin arnaıy buryshtar, bólmeler bar. 2019 jyly Jańaarqa aýdanyndaǵy bilimniń qara shańyraǵy O.Jumabekov atyndaǵy mektepte pýblısıst, redaktor, aýdarmashy Maral Hasen atyndaǵy dárishana saltanatty jaǵdaıda ashyldy. Dárishana-synyp búgingi kún talaptaryna saı ásem, estetıkalyq turǵyda bezendirilgen. Qalamgerdiń ómiri men shyǵarmashylyǵynan molynan habar beredi.
