foto: polisia.kz
Bul bedeldi saıysqa álemniń 80 elinen 100-den astam arnaıy jasaq bólimshesi qatysyp, bes kún boıy taktıkalyq, shtýrmdyq, qutqarý operasııalary, kepildegi adamdardy bosatý jáne kedergiler jolaǵyn eńserý boıynsha óz sheberlikterin kórsetti.
Qazaqstan Respýblıkasy Ishki ister mınıstrliginiń «Suńqar» arnaıy jasaǵy barlyq kezeńde joǵary nátıje kórsetip, jalpy esepte kúmis júldeni jeńip aldy.
Sonymen qatar Qazaqstannyń ózge de arnaıy jasaq bólimsheleri úzdik ondyqqa kirdi. Olardyń qatarynda QR UQK «Arystan» jáne «SSN Aktau», MKQ-nyń «Sardar» arnaıy jasaǵy, sondaı-aq Ishki ister mınıstrliginiń Ulttyq ulan quramasy bar.
Aıta keteıik, «Suńqar» komandasy alǵashqy jáne úshinshi kezeńderde birinshi oryn ıelendi. Nátıjesinde eki altyn jáne jalpy qorytyndy boıynsha kúmis medal alyp, jetistikke jetti. Komanda atalmysh jarysqa osymen ekinshi márte qatysyp jatyr.
Bıylǵy saıystyń tarıhı ereksheligi – Ishki ister mınıstrliginiń arnaıy jasaqtarynyń atynan alǵash ret «Tomırıs» áıelder komandasynyń qatysýy. Onyń quramynda konkımen júgirý sporty boıynsha álemdik rekord ıegeri, 2014 jylǵy Olımpıada oıyndarynyń qatysýshysy, sport sheberi jáne kúshtik sport túrleri boıynsha túrli deńgeıdegi jarystardyń birneshe dúrkin júldegerleri bar.
