foto: Nurbolat Nurjaýbaı
Bektaı Súleımenov esin bilgeli baý-baqshamen aınalysyp keledi. Ol óziniń alǵashqy aǵashyn (órik) úsh jasynda ákesimen birge otyrǵyzǵan. Osylaısha ol, ákesi salyp bergen jolmen júrip, 1965 jyly Qazaq aýyl sharýashylyǵy ınstıtýtyna túsip, onda orman sharýashylyǵynyń mamany bolyp shyǵady. Bul rette aqsaqal, Memleket basshysy bastaǵan «Taza Qazaqstan» aksııasynyń belsendi qatysýshysy.
zakon.kz jazýynsha, bıyl Bektaı Súleımenovtiń óziniń sharýa qojalyǵyn qurǵanyna 34 jyl tolady. Bul sharýada oǵan uldarynyń biri kómektesken.
«Men 1940 jyly Shymkent mańyndaǵy Shardara aýdanynda dúnıege keldim. Ol kezde kolhozdyń dúrkirep turǵan kezi, ár úıdiń aldynda butalar, gúlder, jemis aǵashtary ósip turatyn. Meniń ákem tanymal baǵban boldy, únemi meni ózimen ertip júrip, salanyń qyr-syryn úıretti. Osylaısha, mektepti támamdaǵannan keıin áke jolyn qýyp, ormanshy bolýǵa sheshim qabyldadym. Zeınetkerlikke shyqqanǵa deıin men oblystyń úsh aýdanynda ormanshy qyzmetin atqardym. 1991 jyly ózimniń sharýashylyǵymdy ashtym. Terek, úıeńki, qaraǵashtyń kóshetterin daıyndap sata bastadym», deıdi aqsaqal.
Bastapqyda 5 gektarmen bastalǵan sharýa, 35 jyldyń ishinde 25 gektarlyq fermaǵa aınalǵan. Munda alma, almurt, shıe, órik, qara órik, jıdekter, júzimniń ártúrli sorttary, arsha, terek, úıeńki, qaraǵash pen qaraǵaı ósedi.
«Osylaısha, Qyzylordada qylqan japyraqty aǵashtardy da ósirýge bolatyndyǵyn dáleldedim desem de bolady. О́sip kele jatyrǵan barlyq kóshetterdi býdandastyryp, beıimdedim. Tipti shyrsha men balqaraǵaı da ósedi. Endigi armanym týberkýlez dıspanseriniń aýmaǵynda qylqan japyraqty aǵashtar parkin qurý. Sebebi, olardyń hosh ıisi ókpe aýrýlary bar naýqastar úshin óte paıdaly», deıdi ol.
Bizdiń eko-keıipkerimiz Qyzylordany qaraǵaıly ormanǵa aınaldyrýǵa bolatynyna senimdi. О́ıtkeni, qalany qalaı kógaldandyrýǵa bolatyny jaıly kóptegen jospary bar. Máselen, Qyzylorda áýejaıyna baratyn joldaǵy kógal onyń pıtomnıginen bastalǵan. Bir jarym metr aralyqpen úsh qatarda ósetin aǵashtardyń aýmaǵy 6 km-di quraıdy. Munyń bárin qarııa óz qolymen otyrǵyzyp shyqqan.
Bektaı atany biraz jyldan beri onyń qala mańyndaǵy baqshasyna aparatyn jol mazalaıdy. Onyń aıtýynsha, aýa-raıynyń qolaısyzdyǵy kezinde qojalyqqa jetý muńǵa aınalady. Kópshilik qalany kógaldandyrýǵa úlken úles qosqan aqsaqaldyń bul ótinishin jergilikti bılik nazarǵa alsa eken deıdi.
