2023 jyldyń qarasha aıynda alǵashqy irgetasy qalanǵan «KIA» zaýytynyń qurylysy bıyl kúzde aıaqtalady. Qazirgi tańda zaýyt ǵımaratynyń qurylysy tolyq aıaqtalyp, óndiris jelisine zamanaýı qurylǵylar ornatylyp jatyr. Zaýyt aldaǵy qazan aıynda iske qosylady.
«Kia Qazaqstan» JShS bas dırektory Kım De Kı mınıstrge zaýytta 1500 jańa jumys orny ashylatynyn aıtty. Avtomattandyrylǵan zamanaýı kásiporynnyń dánekerleý jelisinde, avtokólikti boıaý sehy men qurastyrý jelisinde 100 robot paıdalanylady. Jobanyń quny – 200 mln dollar, onyń 80 paıyzǵa jýyǵy sheteldik ınvestısııanyń úlesinde.
Zaýyt óndirisi iske qosylǵan soń jylyna 70 myń «KIA Sorento» krossoverin shyǵara bastaıdy. Onyń 50 myńy usaq bólshekterden qurastyrylady, ıaǵnı bul jerde óndiristiń jergilikti úlesiniń meılinshe joǵary bolýyna basa mán berilip otyr.
Saýda jáne ıntegrasııa mınıstri Arman Shaqqalıev odan keıin «KamLitKZ» seriktestigine bardy. Búginde «KamLitKZ» seriktestigi úsh birdeı iri jobany júzege asyryp jatyr. JShS bas dırektory Alekseı Kotovtyń aıtýynsha, quny 78,2 mlrd teńge bolatyn alpaýyt kásiporyn jylyna 45 myń tonna shoıyn qorytyp, odan aýyr mashınaǵa qajet túrli bólshekter quıady. Búginde munda 500 adam jumys istep jatyr. Zaýyt álemdik standarttarǵa sáıkes keletin zamanaýı joǵary tehnologııalyq qurylǵylarmen jabdyqtalǵan.
«Bul – bizdiń seriktestik iske asyryp jatqan birinshi joba. Byltyr 2 300 jeńil jáne júk kólikterine arnalǵan shoıyn bólshekterin quıdyq. О́ndiris sehtary tolyq iske qosylǵan soń, oblysta shoıyn quıý kólemi shamamen bes ese artady. Seriktestik qazir 82,5 mlrd teńgege ishten janatyn qozǵaltqyshtarǵa arnalǵan shoıyn quımalaryn jáne jetekshi os tetikterin óndiretin eki zamanaýı óndiris ornynyń qurylysyn júrgizip jatyr. Bul kásiporyndar iske qosylsa, taǵy 550 jumys orny ashylmaq», deıdi A.Kotov.
Arman Shaqqalıev jumys sapary aıasynda sút ónimderin shyǵaratyn «Mılh» seriktestiginde bolyp, «Novyı den» saýda belgisimen shyǵatyn sút ónimderiniń tehnologııasymen tanysty. «Mılh» búginde Qazaqstan men Reseı turǵyndaryna etene tanys júz túrli sút ónimin shyǵarady. Seriktestik basshysy Sergeı Blok mınıstrge aldaǵy ýaqytta kompanııa ónimderi eýropa elderine saýdalanatynyn aıtty.
