Aýyl balasynyń alańsyz ómirin arqaý etken povestik shyǵarma adam boıyndaǵy adaldyq, janashyrlyq, meıirim sekildi izgi qasıetterdi kórsetýge tyrysady. Basty keıipker – Ámirdiń balalyq shaǵyn sýretteý arqyly avtor aýyl adamdarynyń kisilik kelbetin, boz jýsan bolmysyn búkpesiz berýge umtylady. Sondaı-aq shyǵarmada adam men tabıǵat arasyndaǵy úzilmes úndestik sóz etiledi.
«Búgingi kúni dúnıeniń dıdary qubylyp, adam boıyndaǵy asyl qasıetterdiń arnasy buzylyp, jappaı ózgeriske ushyrap jatqanyn baıqap kelemiz. Onyń ishinde ult tárbıesiniń ustyny sanalatyn otbasy ınstıtýtynyń qundylyǵy quldyramasa da, shatqaıaqtaǵany belgili. Qolyma qalam alyp, povesti jazýǵa kiriser aldynda tunyǵy laılanbaǵan aýyl adamdarynyń beınesin bederleı otyryp oqyrman oıyna jyp-jyly sáýle túsirgim keldi. Áke, ana, bala arasyndaǵy názik, alaıda berik ara-qatynastyń úılesimdi úlgisin kórsetýdi maqsat tuttym», dedi kitap avtory Tólen Tileýbaıuly.
Kitapqa «Túlkilitaýdyń aspany» povesinen bólek, shaǵyn áńgimeler de jınaqtalǵan. «Aqbóken jylaǵan tún» derekti-kórkem áńgimege qazaqtyń batyr azamaty, qoryqshy Erlan Nurǵalıevtiń brakonerlermen arpalysy, sondaı-aq óshpes erligi negiz etip alynǵan. Al «Aq kógershin», «Gúlsaranyń mahabbaty» áńgimelerinde mahabbatqa adaldyq pen albyrt shaqta adam áreketinde kezdesetin qatelikter sóz etiledi.
Tanystyrylym barysynda oqyrmandar kitap týrasynda oı-pikirin bildirip, tolǵandyrǵan suraqtaryn qoıdy. Artynsha avtor jınalǵandarmen birge avtograf sessııa ótkizdi.
