«Káýsár»

Jýyrda osyndaı atpen jýrnalıst-jazýshy, Qazaqstannyń eńbek sińirgen qaıratkeri, Prezıdent syılyǵynyń laýreaty Qaısar Álimniń kitaby Qazaqstan Respýblıkasy Mádenıet jáne sport mınıstrligi «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha jaryq kórdi (Almaty, «Ana tili» baspasy, 24,0 baspa tabaq, 2015 j.). Avtordyń bul kitabyna káýsar bulaqtyń syńǵyryndaı rýhanı móldirlikten sýsyn qandyrarlyq ádebı portretter men esseler shoǵyrlanǵan. Júrek qylyn sherterlik týyndylardan M.Dýlatov, Ǵ.Mustafın, M.Imanjanov, M.Hakimjanova, Q. Jarmaǵambetov, I. Esenberlın, Á.Nurshaıyqov, S.Máýlenov, Ǵ.Qaıyrbekov, Sh.Murtaza, t.b. ultjandy sýretkerlerdiń «Áde­bıet – ardyń isi» dep qaıral­ǵan talant qaınarlaryn, azamattyq bolmys-bitimin, týǵan eldiń erteńine alańdaǵan kóńil áýenin, halyq múddesi jolyndaǵy qaı­ratkerligin dóp basyp tanýǵa bolady. «Teńizdiń dámi – tamshysy­nan» degendeıin, avtordyń 1982 jyldyń qarashasynda Alma­tynyń irgesindegi Qarǵalyda turatyn klassık jazýshy Ǵabıden Mustafındi ádeıi izdep baryp, suhbattasqan sátinen mysal keltireıikshi: «... Men Ǵabeńniń aıtqanyn istedim. Kitaptyń («Oı áýenderi») tıisti betin ashyp, sýdyratyp oqı jóneldim. «Jazýshy halyq tiline baı, sóz úlgilerine qanyq bolýǵa tıisti. Sonyń ózinde sheber emes, jınaýshy ǵana. Sheberlik – sózdiń ornyn tabýda, mólsherin bilýde. Muny bilgenniń ár sózi altyn. Jalǵanda ne tereń? Sóz tereń. Ne sulý? Sóz sulý. Ne ótkir? Sóz ótkir. Onyń bul qasıetterin adam adam bolǵaly paıdalanyp keledi. Áli kúnge eshkim shegine jete alǵan joq. Demek, ár jazýshy óz tusynda ózindik sóz ónerin kórsetýine ábden bolady. Kórsete almasa, kiná ózinde». Mine, ataqty jazýshynyń keıingi jastarǵa aıtyp ketken ulaǵatty sózi osylaı ómir­sheńdigimen oılandyra túspek eken árkimdi. Sondaı-aq, ádebıettiń keıingi býyn talantty ókilderiniń shy­ǵarmalary da zerdeli zertteýdiń nysanasyna ilikken. Atap aıtsaq, K.Myrzabekov, J.Ábdihalyq, T.Sáýketaı, Q.Jıenbaı, J.Dáý­renbek, Q.Amanjol, t.b. aqyn, jazýshylardyń eńbekteri ádebı portretter men esseler janrynda joǵary talǵammen taldanyp, tanymdyq, tárbıelik jaǵynan tereń saraptalady. Kitaptyń tili jatyq, mazmuny kórkemdikpen ádiptelgen. Áde­bıetke yntyzar árbir oqyrmandy beıjaı qaldyrmasy anyq.  Qalı MYRZA. ASTANA.