Qazaqstan men Reseıge birdeı ótimdi «Novyı den» jáne «Prosto» saýda belgisimen áıgili «Mılh» seriktestigi irimshik, sarymaı, qaımaq, aıran, kilegeıden bastap balmuzdaqqa deıin táýligine 250 tonnadan astam sút ónimderin shyǵarady. Kompanııanyń 4 zaýyty bar, onyń bireýi Qostanaıdan 90 shaqyrym jerdegi Meńdiqara aýdany Borovskoı aýylynda ornalasqan. Búginde tórt zaýytta 710 adam eńbek etip jatyr.
Seriktestik nemistiń «Deutsches Milchkontor Gmbh» kompanııasymen birlesip, ótken jyldyń qarasha aıynda Borovskoı aýylynda qatty irimshiktiń jıyrmadan astam túrin shyǵaratyn iri óndiris ornyn iske qosqan.
Kásiporynnyń ǵana emes, bútindeı bir óńirdiń óndiris salasyna serpin bergen aýqymdy jobaǵa 7,2 mlrd teńge ınvestısııa salyndy. Kásiporyn aksııasynyń 90 paıyzdan astamy nemis kompanııasyna tıesili. Jańa zaýytqa «Karl Schnel», «Reih» tárizdi álemdik tamaq óndirisinde belgili nemis kompanııalarynyń óndiristik qurylǵylary ornatyldy. О́ndiris jelileriniń bári tolyqtaı avtomatty júıede jumys isteıdi. Aýyl ónimin álemge taratyp jatqan kásiporynda 35 adam eńbek etedi.
«Mılh» ónimderi búginde elimizdiń barlyq aımaǵyna, Reseıdiń Máskeý, Sankt-Peterbýrg, Chelıabi, Novosibir, Or, Petropavl-Kamchatsk, Irkýtsk, Saha óńirlerine eksporttalady.
Munyń syrtynda, kompanııa óz ónimderin Batys Eýropa naryǵyna shyǵarýdy kózdep otyr. «Mılh» seriktestiginiń Germanııadaǵy áriptesi «Deutsches Milchkontor Gmbh» kompanııasynyń Eýropa elderinde 300-den asa sýpermarketi bar. Taıaýda ǵana qos tarap Qostanaı irimshikterin osy saýda núktelerine shyǵarýdyń jaı-japsaryn pysyqtap, ortaq mámilege kelgen. Kompanııa ónimderiniń Eýropa naryǵyndaǵy jyldyq saýda aınalymynyń kólemi shamamen 500 mln eýrodan asatyn bolady.
Kelisilgen joba boıynsha Qostanaı sút ónimderiniń eń iri saýda núktesi Gambýrgte bolady. Odan ári búkil Germanııaǵa, odan qaldy London, Varshava, Amsterdam, Brıýssel, Parıj, Vena, Madrıd, Mılanǵa taraıdy.
«Kezinde Qazaqstannan syrtqa qonys aýdarǵan jurttyń birazy búginde Eýropa elderinde turyp jatyr. Olar Qazaqstan ónimderiniń tabıǵı shıkizattan jasalatynyn jaqsy biledi. Sondyqtan ol jaqtaǵy tutynýshylar bizdiń taýarlarymyzdy attaı qalap alatynyna senimdimiz», deıdi kompanııa basshysy Sergeı Blok.
Saýda jáne ıntegrasııa mınıstri Arman Shaqqalıev kompanııa jumysyna joǵary baǵa berip, kásiporyn basshysy Sergeı Blokqa otandyq ónimniń eýropa naryǵyna shyǵarýǵa barynsha qoldaý kórsetetinin aıtty.
«Mılh» búginde Qostanaıdyń mańaıyndaǵy eldi mekenderde sıyr ustap otyrǵan
12 myń otbasynan sút satyp alady. Osynyń nátıjesinde 40 myń adam turaqty tabys taýyp otyr. Olardyń qatarynda Qostanaı aýdanyna qarasty Moskovskıı aýylyndaǵy «Bolashaq» aýylsharýashylyq kooperatıvi de bar. Kooperatıv basshysy Azat Mıshtorııdiń aıtýynsha, aýyl turǵyndary birigip, sút óndirip satýǵa jumylǵaly qoldaǵy saýyn sıyrdan túsetin tabys ta eselene túsken.
Degenmen óndirisi aýqymdy kásiporyn, ásirese qys maýsymynda shıkizattan qysylyp qalady. Kompanııa basshysy óndiriske qajetti kólemde sút jetpeı qalatyn kezder bolyp turatynyn, biraq munyń bári aldaǵy ýaqytta sheshimi tabylatyn ýaqytsha qıyndyq ekenin aıtty. О́ıtkeni búginde óńirde myńdap sıyr ustaıtyn kóptegen iri sút fermalary salynyp jatyr. Bul fermalar iske qosylyp, ónim bere bastasa, óndiris te shıkizattan taryqpaıdy.
Arman Shaqqalıev jumys saparynyń sońynda óńir turǵyndarymen, jeke kásipkerlermen kezdesip, kóptiń kókeıinde júrgen birtalaı saýaldarǵa jaýap berdi.
Qostanaı oblysy
