Sýret: tolqyn.kz
Dárigerlerdiń aıtýynsha, jańa týǵan náresteniń jaǵdaıy saǵat saıyn ýshyǵa túsken. Onyń terisi qataıyp (sklerodermııa), baýyry men kók baýyry aıtarlyqtaı úlkeıgen eken. Kásibı mamandar shuǵyl iske kirisse de, bastapqyda jaǵdaıdy qalypqa keltirý qıynǵa soqqan. Mınýttar jyljyp, sekýndtar syrǵyǵan saıyn balanyń hali múshkil bola túsken. Alaıda mamandar ilki sátke de sábı ómiri úshin kúresti toqtatpaǵan.
«Júrgizilgen zertteý jumysynyń nátıjesinde balada aýyr sıtomegalovırýs (SMV) ınfeksııasy anyqtaldy. Bul ınfeksııa baýyrdyń qyzmetin buzatyny belgili. Árıne, jaǵdaıdyń máz emes ekenin birden túsindik. Jergilikti mamandar mundaı kúrdeli jaǵdaımen buryn-sońdy kezdespegen edi. Biraq qoldan kelgenshe kómek kórsettik. Esh aıanyp qalǵan joqpyz», deıdi dárigerler.
Jaǵdaı tym kúrdeli, árbir mınýt óte qymbat ekenin tereń túsingen mamandar emdeý sharalaryna dereý kirisken. Aq halatty abzal jandardyń áreketi áýeli zaıa ketkendeı kóringeni de jasyryn emes. О́ıtkeni em-dom sharalary jasalǵanyna qaramastan, bastapqy kúnderi sábıdiń densaýlyǵynda aıtarlyqtaı oń ózgeris baıqala qoımady. Birneshe kún boıy zár shyǵara almaǵan náresteniń reanımasııadan shyǵýy muńǵa aınaldy. Áıtkenmen sertke berik mamandar barlyq qıyndyqqa qaramastan, onyń ómiri úshin kúresti jalǵastyra berdi.
«Bastapqyda qalyptasqan jaǵdaı bir sátke bolsyn úmit jibin úzgendeı kóringeni ras. Alaıda birneshe kúnnen keıin kútken nátıjege qol jetkizdik. Sábı zár shyǵardy, qan aınalymy aıtarlyqtaı jaqsardy. Arada on kún ótken soń alǵash ret ana sútimen qorektendi. Sol sátte eńbegimiz aqtalǵanyn aıqyn sezindik. Balanyń baýyrynyń qyzmeti birtindep qalpyna kelip, kóp uzamaı jasandy tynys alý apparatynan ajyrattyq», deıdi mamandar.
Naýqastyń jaǵdaıy turaqtalǵannan keıin mamandar ony odan ári emdeý úshin oblystyq kópbeıindi balalar aýrýhanasyna aýystyrý týraly sheshim qabyldady. Búginde jaǵdaıy jaqsarǵan sábıdiń ata-anasy bala ómirin arashalap qalǵan dárigerlerge alǵysyn jaýdyryp jatyr.
Balanyń ómiri úshin kúresken reanımasııa bóliminiń meńgerýshisi Áýez Hasenuly, Aıda Joldasbaıqyzy, Araılym Seıdarapqyzy bastaǵan dárigerlerdiń jankeshti, tabandy eńbegin erekshe aıta ketken jón. О́ńirde jańa týǵan sábıde buryn-sońdy kezdespegen dertpen kúresken olardyń eńbegi zor.
TARAZ
