Foto: Ǵylym jáne joǵary bilim mınıstrligi
Qańtar aıyndaǵy UBT-ny tapsyrǵan 164 myńǵa jýyq talapkerlerdiń 76,81%-y qazaq tilinde, 23,14%-y orys tilinde, 89 adam aǵylshyn tilinde testileýden ótti.
Shekti baldy 70,35%-ǵa jýyq talapker jınady. Ortasha ball - 65,81 baldy qurady. Eń joǵary ball – 139. Jalpy 186 talapker 130-dan joǵary ball jınady.
Testke qatysýshylardyń basym bóligi «Matematıka-Fızıka», «Bıologııa-Hımııa», «Matematıka-Informatıka» kombınasııalaryn tańdaǵan. Eń az tańdalǵan kombınasııa – «Hımııa-Fızıka», ony 197 adam tapsyrǵan.
Qańtar UBT-synyń qorytyndysy boıynsha talapkerler «Oqý saýattylyǵy» pánin joǵary deńgeıde tapsyryp, ortasha eseppen suraqtardyń 75,43%-yna durys jaýap bergen. Al «Fızıkany» tapsyrǵan talapkerlerdiń 32,32% ǵana tapsyrmany durys oryndaǵan, olar úshin «Elektromagnıttik ındýksııa» taqyryby qıyn boldy.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda qańtar UBT-syna 392 talapker qatysqanyn aıta ketken jón.
UBT ótkizý barysynda 197 ereje buzýshylyq anyqtalǵan. Onyń ishinde 101 talapker smartfon jáne shpargalka salyp ótý áreketi saldarynan test tapsyrý múmkindiginen aıyrylsa, testileý kezinde erejelerdi buzǵany úshin aýdıtorııadan 96 adam shyǵarylǵan.
Respýblıkalyq komıssııa jumysyn aıaqtady, talapkerlerdiń sertıfıkattary jeke kabınette qoljetimdi.
Aıta ketsek, 2025 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.
Esterińizge salaıyq, qańtardaǵy UBT-ǵa shartty túrde aqyly negizde kúndizgi oqý nysany boıynsha joǵary oqý oryndaryna qabyldanǵan, jazǵy UBT nátıjeleri boıynsha shekti ball jınamaǵandar, shyǵarmashylyq UBT-dan basqa daıyndyq baǵyttaryna, pedagogıkalyq baǵytqa aqyly negizde aýysqysy keletinder, sondaı-aq mektep bitiretin túlekter joǵary oqý oryndaryna aqyly negizde túsý úshin qatysady.
