Túbi túsken tús

Hat kepti. Ájesinen eken. Oqı  jóneldi. «Balam, qatty qınalyp júrsiń-aý deımin, úsh kún boldy túsimnen shyqpaısyń. Tún balasy  dalada tik turyp, uıyqtap turǵanyńdy kó­re­min, jataǵyń bolmaı japa shegip júrgennen saýmysyń... О́ıtken oqýy qursyn, janyma kelshi, ekeýmizge meniń pensııam da jetedi... Qoı baǵyp, ashtan ólgen azamatty kórgen emespin. Úı-jaıyń bolmasa, áı-shaıǵa qarama. Asyǵa kútemin, ájeń».

Kúlgen de qoıǵan. Ájesine tańy bar, osy oqýǵa túsken kúnniń ertesinde ájesinen: «Balam túnde túsimde seni kórippin. Aýylǵa aıyrpylanmen kelipsiń, degeniń bolady eken... Ájeń» dep telegramma kelgeni bar.

Ekinshi oqıǵa

Oqýdyń bel ortasynan asqan. Sonyń kesiri, keń júremin dep, onyń ústine qoldan myń teńgege shalbar alyp kıemin dep, qalta qaǵylyp qańsyp otyrǵany. Qaryz alýdyń jóni joq. Al alsyn, onysy, árige ketse on kúndi ­orap alar, odan ári she... Aýylǵa alaqan  jaıý­dyń qısyny kelmeıdi...

Da... ne istese eken?.. Vokzalǵa baryp, kómir túsirýden basqa shara joq.

Hat kepti. Baıaǵy ájesi. Oqı jóneldi. «Balam, basyńa is tústi-aý deımin shamasy... Túsimde ústi-basyń kúıelesh-kúıelesh, kúıeden bota  kózderiń ǵana jyltyraıdy. Talqan jep, tuz kóterip júrgendeı bir túrli eńseń túsip, ezilip ketipsiń... Bile qoıdym da, óz esebimnen bes júz teńge jiberdim. Aınalaıyn ala ǵoı. Ájeń».

Pitýa qýanǵannan kókke sekirip, tabany jerge tıgende aýzynan «Ýra»degen ánsheıin­de aıta al­­maıtyn sózi shyqty. Bunyń ersi qylyǵyna bu­­rysh­­ta búrisip otyrǵan ala mysyq atyp joǵal­dy...

Pitýa ájesinen aınaldy.Qalaı ǵana ekenin, bul qınalsa bile qoıady. Osymen on shaqty bolar, óz esebinen aqsha jiberip — jamaýyn jaba toqyp jibergeni.

Úshinshi oqıǵa

Besinshi kýrs. Belden «beldik» túsken shaq. Qol bosap, arqa keńip, bar-bar aýyrtpa­­lyq art­­ta qalǵan kez.

Pitýa qalanyń sońǵy tamashasyna tamsanyp júrip aıyqtyrǵyshtan bir-aq shyqqany bar.

...Tanys-tamyr, zyr júgiris... Qutyldy-aý áı­­teýir.

Talyqsyp turyp tańdaı qaǵyp kórip edi, taq-taq etedi. Qalta qaǵylǵan. Aqsha aýyly alys. Bary bes kúnge jetedi.

Pitýa kóp oılanbaı, qınalysym ájeme jetpeı júrgen bolar dep basyn ustap baz keshti, jata qap jastyq qushty; dóńkıip dóńbekship kórdi, «osymdy ájeme jetkize kór» dep erin jybyrlatyp sybyrlap ta aldy, búk túsip búk­­­tetildi, qabaq shytyp búıtken ómirine qar­ǵys aıtty, ne kerek, qolynan kelgenin istedi, oıy — osymdy ájem sezse, tezirek óz esebinen «esendesse» boldy...

Hat kepti. Aınalaıyn ájesi. Eńbeginiń esh ketpegenine rıza keıippen qolǵa aldy.

«Aınalaıyn balam. Esiń bolsa elińdi tap. Túsime kiripsiń. Túsimde — aıdaladan bir bótelke taýyp alǵan ekenmin deımin. Alyp qarasam, aýyzy tyǵyndaýly, ishinde búrisip sen otyrsyń... Tyǵynyn shyǵara alsamshy. Syndyryp alaıyn desem, ózińdi birge syndyryp alatynymdy bilemin... Sodan, qolymda bótelke, ishinde sen, táýipten táýip, moldadan molda qoımaı bezildep júr ekenmin deımin... Osy tusta oıanyp ketippin... Dáý moldaǵa baryp túsimdi aıtyp edim, «nemeremdi tezdetip elińe al­dyr, jaǵdaıy qıyn...» degen soń ózińe tek hat qana jazyp otyrmyn. О́tirik qınalǵanyńdy bil­sem de bir ret eshteńe etpes dep aqsha salaıyn dep edim, álgi molda, bul salǵanyń — balańdy otqa ıter­geniń... dep úrkitti. Ol da hat-habar jibe­­retin jerde turǵandyqtan sala almadym. Ba­lam, ótinerim, esińdi jısań tezirek elińe qaıt. Ájeń».

Berik SADYR