Kitaptardy ýnıversıtetke ǵalymnyń qyzy Qarlyǵash Tursynova syıǵa tartty. Is-shara Open Library AlmaU, «Aspandaý» ǵylymı-bilim berý qory, «Adyrna» ulttyq etnografııalyq birlestigi jáne «Jolshy» fılosofııalyq qoǵamynyń qoldaýymen «Dala ilimi» túrki ǵylymı semınary aıasynda uıymdastyryldy.
Kezdesýdi kórnekti ǵalym týraly jyly áńgimeler men esteliktermen bastaǵan moderator,PhD, «Jolshy» fılosofııalyq qoǵamynyń tóraǵasy Nurjan Qulymjanov ǵalymnyń ádisnamasy epostaný, etnomýzykologııa, etnografııa, etnopsıhologııa, folklortaný menádebıettanýdyń damýyna aıtarlyqtaı áser etkenin atap ótti.
Kitaphananyń ashylýyna qatysqan AlmaU Prezıdenti Asylbek Qojahmetov «Edige Tursynov– óz ómirin qazaq aýyz ádebıeti men folkloryn zertteýge arnaǵan kórnekti zertteýshi.Kitaphanamyz onyń kóp jylǵy eńbekteri men ǵylymı izdenisteriniń nátıjeleri jınalatyn orynǵa aınalady. Qazirgi ýaqytta AlmaU qoryna Edige Tursynovtyń jeke kitaphanasynan 915 kitap kelip tústi, taǵy 800-den astamy tirkelip jatyr», - dep atap ótse, tarıh ǵylymdarynyń doktoryMarat Sembınniń aıtýynsha, elimiz táýelsizdik alǵanǵa deıin qıyn kezeńderdi basynan ótkergen ǵalym tabandylyǵy men bilimge degen qushtarlyǵynyń arqasynda artynda mol mura qaldyrdy. Al osynaý qundy eńbekter jastardyń tarıhı jáne ádebı derekkózdermen tanysýyna keńinen múmkindik beredi.
Fılologııa ǵylymdarynyń kandıdaty, ál-Farabı atyndaǵy Qazaq ulttyq ýnıversıtetiniń professory, túrkitanýshy jáne aýdarmashy Qaırat Jańabaev «Edige Tursynov ǵajaıyp oqyrman boldy. Ǵylymı baspadan shyqqannyń bárin keıinge qaldyrmaı, qaryndashpen belgiler, syn-eskertpeler, tolyqtyrýlar qoıyp, birden oqıtyn. Ol óziniń kitaphanasy úshin de, bolashaq oqyrmandary úshin de eń jaqsy ǵylymı ádebıetterdi tańdaýǵa kásibı kózqaraspen qarady»deıdi. Al fılosofııa ǵylymdarynyń doktory, mádenıettanýshy, Qurmanǵazy atyndaǵy Qazaq ulttyq konservatorııasynyń professory Almıra Naýryzbaeva atap ótkendeı: «Edige Tursynov qazaq folklorynyń shynaıy baılyq ekenin túsinýge shabyttandyrdy. Biz sııaqty ótken ǵasyrdyń 70-jyldary urpaqtaryn mádenı murany qurmetteýge úndedi. Ol folklordy zertteýde ǵana emes, Qazaqstannyń barlyq áleýmettik-gýmanıtarlyq ǵylymynyń ádisnamasynda serpilis jasaǵan ǵalym».
«Ol – halyqtyń genologııalyq jadyn ózine qaıtarǵan ǵalym. Uly ǵalymnyń murasy keńestik dáýirde alǵash ret dala týraly bilim folklor, mıfter men epostar arqyly zerttelgendigimen erekshelenedi. Bul ejelgi tarıh pen tildi zertteýge jol ashty» deıdi jýrnalıst-fılolog, «Mysl» qoǵamdyq-saıası jýrnalynyń qyzmetkeri Dastan Eldesov. Al ǵalymnyń zıratyna eskertkish tas ornatýda bastamashylardyń biri bolǵan «Adyrna»ulttyq-etnografııalyq birlestiginiń basshysy Arman Áýbákirdiń aıtýynsha, qalalyq kitaphanalardan tabyla bermeıtin qundy eńbekterdi Edige Tursynovtyń úıinen tabýǵa bolady.
Is-shara mýzykalyq, teatrlyq qoıylymdarmen jalǵasty. Halyq ártisi Sanat Isaev dástúrli qazaqánderin oryndasa, stýdentter ǵalymnyń eńbekteri men murasyna arnalǵan teatrlandyrylǵan qoıylymdar kórsetti.
