Árisi AQSh, berisi kórshiles memleketterden arnaıy at basyn burǵan mártebeli meımandar Taraz tórinde qolóner sheberlerine kórsetilip jatqan qoldaýǵa rızashylyqtaryn bildirgeni jadymyzda. Sodan da bolsa kerek, jergilikti qolóner sheberleri halyqaralyq baıqaýlarǵa qatysa bastady.
Tól týyndylary birneshe memlekettegi áriptesteri tarapynan moıyndalǵan tarazdyq qolónershiler Indonezııa elinde bastalǵan halyqaralyq «INACRAFT-2025» kórmesine qatysyp, ulttyq murany nasıhattap qaıtty. Belgili mamandardyń aıtýynsha, álemniń birneshe elinen maıtalman qolóner sheberleri qatysatyn kórmeniń qaı kezde de bási bıik. Bul óz kezeginde tarazdyq mamandardyń tájirıbe almasýyna zor múmkindik týǵyzady.
«Qolónershilerdiń halyqaralyq kórmesi 25 jyl boıy turaqty túrde uıymdastyrylyp júr. Indonezııadaǵy aýqymdy mádenı is-sharaǵa Orta Azııa, Ońtústik Azııa elderiniń ókilderi jáne Dúnıejúzilik qolónershiler tizimine engen qalalardyń mamandary qatysqanyn aıta ketken jón.
Qatysýshy memleket ókilderi negizinen ulttyq baǵyttaǵy týyndylaryn usynǵanyn baıqadyq. Sol turǵydan alǵanda bizdiń sheberlerdiń shyǵarmalarynan da sáıkestik baıqalady.
Qalaı desek te ulttyq tanymynan tamyryn ajyratpaǵan el ekenimizdi tanyttyq degen oıdamyn. Eń bastysy, kórmege kelgen meımandar bizdiń qolónershilerdiń týyndylaryna asa qyzyǵýshylyqpen qarap, olardyń sheberligine tánti boldy. Qysqasy, biz Indonezııada qazaqtyń tól mádenıetin nasıhattadyq. Munyń bári memlekettik qoldaýdyń arqasynda múmkin bolǵanyn aıta ketken lázim. Jalpy alǵanda, qolóner sheberlerine qaı kezde de qoldaý kórsetýge ázirmiz», deıdi Taraz qalasy ákiminiń orynbasary Gúldana Álimjanqyzy.
Delegattardyń arasynda jyldar boıy ǵajap týyndylarymen talaı mamandardy tánti etken Anar Beksultanova da bar. Onyń aıtýynsha, tórt kúnge sozylǵan is-shara joǵary deńgeıde uıymdastyrylǵan. Al kórmege kelgen qarapaıym halyq tarazdyq qolónershilerdiń eńbegin joǵary baǵalaǵan.
«Biz Dúnıejúzilik qolónershilerdiń tizilimine ulttyq kıimder arqyly engenbiz. Sondyqtan osy kórmege ulttyq kıimderdi jáne tórge iletin tuskıiz, syrmaq, shapan, jadaǵaı, kıizden jasalǵan aıaqkıim, baskıim, túrli sómkeni apardyq. Sarapshylar tarapynan biz aparǵan kıimder men buıymdarǵa zor qyzyǵýshylyqty baıqadyq.
Jergilikti halyq ta mádenıetimiz ben tarıhymyzǵa qatysty túrli suraq qoıyp, jaýap aldy. Qalaı desek te, Indonezııadaǵy is-shara biz úshin tabysty boldy dep aıtýǵa tolyq negiz bar. Áriptesterimizben tájirıbe almastyq, ártúrli taqyrypta oı bólisip, bir jasap qaldyq», deıdi A.Beksultanova aǵynan jarylyp.
Taraz
