Sýret: aqmeshit-zhastary.kz
Osy oraıda Memleket basshysy Qasym-Jomart Toqaevtyń «Biz, Qazaqstan halqy, ózgelerdiń teris yqpalyna túspeıtin óz ıdeologııamyzǵa súıenýimiz kerek» degen anyq ári naqty tujyrymyna júginý mańyzdy. Búginde «ıdeologııa» degen sózge úrke qarap, jatyrqap qalǵan jaıymyz bar. Ony ústemdiktiń quraly dep qabyldaıtyndar kezdesedi. Bul sózden at-tonymyzdy ala qashýdyń qajeti joq. Prezıdenttiń 2023 jylǵy 20 naýryzdaǵy Jarlyǵymen bekitilgen Qazaqstan Respýblıkasynyń aqparattyq doktrınasynda «ıdeologııa» sózi «qundylyq» dep qabyldandy. Ideologııa ártúrli bolýy múmkin, al ulttyq qundylyq – bireý ǵana. Sondyqtan aqparattyq ıdeologııanyń ustyny ulttyq qundylyq bolýǵa tıis.
Ulttyń tamyry – tarıh. Bizdiń qyran qus ushsa, qanaty talatyn, qulan jortsa, tuıaǵy tozatyn Ula dalamyzda myńjyldyqtardyń shejiresin aıqyndaǵan baıtaq tarıhymyz bar. Sonyń tuńǵıyǵynan qaınap shyqqan qundylyqtar qısapsyz. Bizdiń memlekettik ıdeologııamyzdyń qaınar bastaýy da sol qundylyqtar bolýǵa tıis. Tamyry tereńde jatqan ulttyq ıdeologııa qandaı da alasapyrandarǵa tótep bere alady. Tarıhta ulttyq ıdeologııasy bekem halyqtyń rýhy da kúshti bolady. Ulttyq ıdeologııasy myqty, rýhy asqaq halyqty eshqandaı surapyl jeńe almaıdy. О́rshil rýh halyqty barlyq ýaqytta bıikterge súıreıdi.
Ulttyq ıdeologııa degenimiz – tarıhtyń joǵaltqanyn búginnen izdeý, búginniń talabyn tarıhta ketken qatelerden arylta otyryp qanaǵattandyrý, keleshekke ulttyq qundylyqtar fılosofııasy arqyly paıym jasaý. Osy maqsattardy oryndaýǵa qyzmet etetin búkil ıdeıalar ulttyq ıdeologııamyzdy quraıdy. Prezıdent atap kórsetkendeı, bizdiń maqsatymyz – keler urpaqqa Qazaqstandy tuǵyry myǵym, ekonomıkasy qýatty, rýhy asqaq memleket retinde tabystaý jáne eldik isterdi shashaý shyǵarmaı laıyqty jalǵastyratyn jasampaz urpaq tárbıeleý. Olaı bolsa, memlekettik ıdeologııanyń basty maqsaty – jańa dáýirdiń oqyǵan, bilimdar, bilikti, ozyq tehnologııalardy, ilim-bilimdi tereń meńgergen, deni saý, izdenimpaz, erik-jigeri myqty, aqyl-parasaty men ar-ojdany bıik, otanshyl ultty tárbıeleý.
Búgingi zaman – mádenıetterdiń jahandaný kezeńi. Jańa sapaǵa kósher aldyndaǵy, ıaǵnı óz damýynyń eń bıik satysy birtutas adamzattyq órkenıetke quıylar aldyndaǵy qarbalas shaǵy. Jahandaný – órkenıettiń kezekti damý satysy. Endigi aıtpaǵym, osy oılarymyzdy Prezıdenttik ortalyqta qandaı is-sharalar arqyly kópshiliktiń sanasyna sińire alatynymyz jaıynda.
Prezıdenttik ortalyq Memleket basshysynyń strategııalyq bastamalaryn qoldaý men ilgeriletý boıynsha aýqymdy ıdeologııalyq jáne qoǵamdyq is-sharalardy iske asyrýǵa úlesin qosyp keledi. Ortalyqtyń mádenı mańyzyna keletin bolsaq, munda ótkiziletin is-sharalardyń deni qazaq mádenıeti men tarıhyn tanytýǵa, ultty uıystyrýǵa, qoǵamdy biriktirýge, azamattarymyzdyń patrıottyq rýhyn oıatýǵa baǵyttalǵan. Bul ásirese ulttyq biregeıligimizdi nyǵaıtýdy asa qajet etetin qazirgi jahandaný jaǵdaıynda óte mańyzdy. Mundaı is-sharalar elimizdiń halyqaralyq arenadaǵy oń ımıdjin qalyptastyrýǵa yqpal etedi dep oılaımyn. Sondaı-aq ortalyq memleket damýynyń ózekti máselelerin talqylaıtyn mańyzdy platforma retinde bilim fýnksııalaryn da atqarady. Bul azamattardy elimizde bolyp jatqan úderister týraly qulaǵdar bolyp, osy isterge belsendi aralasýyna múmkindik beredi.
Biz jastardy qoldaýǵa ári azamattyq qoǵamdy damytýǵa baǵyttalǵan áleýmettik jobalarǵa aıryqsha kóńil bólýge tyrysamyz. Bul memlekettiń turaqtylyǵyn, azamattardyń bılikke degen senimin nyǵaıtýǵa yqpal etedi. Qazirgi tańda qyzmetimizdiń negizgi baǵyty – «Ádiletti qoǵam – Adal azamat» tujyrymdamasy aıasynda mádenı ári bilim jobalaryn iske asyrý, qoǵamdyq jumystardy túzý jelisin qalyptastyrý. Sondyqtan jahandyq úderisterdi oı eleginen ótkizý, álemdik saıasat pen ekonomıkadaǵy syndarly ózgeristerdi Qazaqstannyń uzaq merzimdik múddeleri turǵysynan saraptaı bilý, eldigimizdi, qaster tutar kıemiz táýelsizdigimizdi nyǵaıtý úshin ıdeologııalyq shebimizdi bekemdeýge, elimizdiń damýyn nysanaly túrde zerttep, zerdeleý basty nazarda bolýy kerek.
Baqytjan TEMIRBOLAT,
Qazaqstan Respýblıkasy Prezıdenttik ortalyǵynyń dırektory
