Almaty - 11 stansasy bar, uzyndyǵy 13,4 km bolatyn metro jumys isteıtin Qazaqstannyń jalǵyz qalasy bolyp tabylady. Endi osy qoldanystaǵy jelilerdi keńeıtý jáne batys jáne shyǵys baǵyttarda metronyń eki tarmaǵynyń qurylysy boıynsha jumystar júrgizý josparlanyp otyr.
«Almaty úshin metropolıten jelilerin qysqa merzimde salý jobasyn iske asyrý mańyzdy basymdyqtardyń biri bolyp tabylady. Osyǵan baılanysty qurylys sheńberinde áleýetti seriktesterdiń tizimin qalyptastyrý kezinde biz birinshi kezekte qytaılyq kompanııalardyń, onyń ishinde kez kelgen jobanyń tabysty ári sapaly iske asyrylýyna senim uıalatatyn CRCC korporasııasynyń tájirıbesi men múmkindikterin zerttedik. Bul bizdiń elderimiz arasyndaǵy saýda-ekonomıkalyq baılanystardy odan ári nyǵaıtýǵa eleýli úles qosady», dep atap ótti Erbolat Dosaev.
CRCC basqarma tóraǵasy Daı Hegen yntymaqtastyqqa qyzyǵýshylyq tanytyp, CRCC kompanııasy Qazaqstanda jalpy somasy 650 mln AQSh dollaryna jýyq birqatar aýqymdy ınfraqurylymdyq jobalardy iske asyryp jatyrǵanyn atap ótti.
«CRCC Qytaıda aldyńǵy qatarda jáne árdaıym yntymaqtastyqqa ashyq. Búginde birneshe qytaılyq kompanııa Almatyda jobany júzege asyrýǵa qatysýdy josparlap otyr jáne biz teń jaǵdaıda básekelesýge nıettimiz. Baı tájirıbeniń arqasynda biz Almatyda jobalardy tabysty iske asyra alamyz dep úmittenemiz», dedi Daı Hegen.
Esterińizge sala keteıik, CRCC álemdegi iri tehnıka óndirýshi, eń qýatty jáne aýqymdy halyqaralyq qurylys korporasııalarynyń biri. 2024 jyly CRCC korporasııasy Fortune Global-500 reıtınginde 43-oryndy ıelendi. Kompanııa QHR-da temir joldyń úshten eki bóligin jáne metropolıtenniń besten úsh bóligin saldy. CRCC 700 birlikten astam uńǵymalyq qalqandar parkine ıe. Qurama metall konstrýksııasy bolyp tabylatyn osy joǵary tehnologııalyq mashınalar metro jáne basqa da jerasty qurylystaryn salý jónindegi jumystardy tıimdi ári qaýipsiz júrgizýge múmkindik beredi.
Bir kún buryn, 18 aqpanda Dosaev qytaılyq China Exim Bank bankiniń ókilderimen kezdesti. Buǵan deıin depýtattar metrony keńeıtý úshin 1 mlrd dollar qajet degen boljam aıtqan bolatyn.
