Sýret: finance.digitalbusiness.kz
Toǵyz joldyń torabynda ornalasqan Shý aýdanynda tórt túlik ósirýge nıetti turǵyndarǵa 100 bas mal berildi. «Ataı» sharýa qojalyǵynyń basshysy Sáken Ataevtyń bas bolýymen Abaı aýylynyń turǵyny Qalısultan Tilepbergenov pen Baqytjan Botaevtyń árqaısysy 50 bas qoı aldy. Olar 3 mln teńge bereshekti 5 jyl ishinde belgilengen erejege sáıkes óteýi tıis.
«Aýyldastarymdy qoldap, aýyldyń damýyna úles qosýǵa árqashan ázirmin. Bolashaqta aýyl azamattaryna asyl tuqymdy tórt túlik berý máselesin de oılastyryp otyrmyn. Eń bastysy jerlesterdiń is bastaýǵa nıet tanytyp otyrǵany kóńil qýantady. Nıet bolǵan jerde nátıjeniń kóp kúttirmeıtini daýsyz», deıdi Sáken Ataev.
Oblystyq Aýyl sharýashylyǵy basqarmasy basshysynyń orynbasary Tólebek Qulekeevtiń aıtýynsha, taýarly nesıe alǵan azamattardyń qaryzdy óteýi úshin aıtarlyqtaı jeńildik qarastyrylǵan. Máselen, birinshi jyly tólem máselesi boıynsha demalys jarııalansa, odan keıin jyl saıyn tóldiń 50 paıyzy negizinde ótem tóleýge mindetteledi. Osylaısha, bes jylda nesıe boryshyn óteıdi. Joba boıynsha birinshi kezekte az qamtylǵan otbasylar men jumyssyz júrgen azamattardy qoldaýǵa basymdyq beriledi.
Shý aýdanynyń ózge de kásipkerleri aýyl turǵyndaryna taýarly nesıe berýge qulshynys bildirip otyr. Olar kem degende 30 bas ýaq mal, 15 iri-qara jáne 10 jylqy usynýy tıis.
Shalǵaıda ornalasqan Moıynqum aýdanyndaǵy «Úrker» sharýa qojalyǵynyń jetekshisi aýyl turǵyndaryna 20 bas iri qara men 100 bas ýaq mal berýge daıyn ekenin jetkizdi. Al jergilikti atqarýshy bılik ókilderi taýarly nesıe alýǵa nıetti aýyl turǵyndarynyń tizimin jasaqtap jatyr.
Aýyl sharýashylyǵy basqarmasynyń mamandary jyl sońyna deıin 80-ge jýyq kelisimge qol qoıyp, jobany jandandyra túsemiz deıdi.
Jambyl oblysy
