Zaýyt iske qosylǵanda qaladaǵy óndiriske qajetti jabdyqtardy jergilikti jerde óndirý tıimdiligin arttyrýǵa septigin tıgizbek. Sonymen qatar Jańaózende jumyssyzdyq máselesin sheshýge de eleýli áserin tıgizedi. Aýmaǵy 12 gektardy quraıtyn atalǵan jobanyń irgetasy ótken jyly óńir basshysynyń bastamasymen munaıly qaladaǵy №1 óndiristik aımaqta qalanǵan edi. Qurylysty júrgizýdi munaı-gaz salasy men hımııalyq óndiris úshin qajetti jabdyqtardy shyǵaratyn óńirdegi jetekshi mashına jasaý kompanııalarynyń biri retinde tanymal «Qaskor Injınırıng» JShS qolǵa alǵan.
Aımaq basshysy Nurdáýlet Qılybaı bıyl kóktem aılarynda ashylady dep mejelengen zaýyt aýmaǵyna baryp, qurylys jumystarymen tanysty.
Qurylys aýmaǵynda baqylap-ótkizý pýnkti, jataqhana men ashana qurylystary paıdalanýǵa daıyn, al negizgi qurylys alańynda qazirgi tańda metall konstrýksııalardy montajdaý 75%-ǵa aıaqtalǵan.
Ýchaske bastyǵy Jeńis Tuqaevtyń aıtýynsha, nysannyń shatyry men qasbeti jabylyp, qurylys jumystary kestege sáıkes qarqyndy júrgizilip jatyr. Sondaı-aq qazandyq pen qosalqy stansanyń qurylysy da bekitilgen kesteden keshikken joq.
Qazirgi ýaqytta qurylys alańyna 126 adam jumyldyrylǵan, olardyń basym bóligi Jańaózen qalasynyń turǵyndary. Qurylys ýchaskesi basshylarynyń aıtýynsha, jabdyqtardy ornatý 20 aqpanda bastalyp, naýryz aıynyń sońyna deıin ǵımarattyń kontýry tolyǵymen jabylady.
Sapar barysynda aımaq basshysy sorǵy-kompressorlyq qubyrlar men sorǵy shtangalaryn shyǵaratyn zaýyt qurylysynyń jumystaryna qatysty qajetti barlyq sharalardy qabyldap, belgilengen merzimde aıaqtaýdy tapsyrdy. Sonymen birge sharýa qojalyǵy ıelerimen kezdesip, aýyl sharýashylyǵy salasyndaǵy jáne jalpy eldik máselelerge de nazar aýdaryp, kózqarasyn jetkizdi.
Mańǵystaý oblysy
