Arıstotel «Adam – áleýmettik janýar» degen anyqtama bergen. Biraq búgingi sıfrlyq dáýirde adamdar bir-birinen rýhanı turǵyda alystap barady. Jasandy ıntellekt, áleýmettik jeli, vırtýaldy álem – bári de bizdi shynaıy qarym-qatynastan alshaqtatyp jatyr. Ǵalymdar adamnyń jalǵyzdyqqa jutylýy jan saýlyǵyna ǵana emes, tán saýlyǵyna da zııan keltiretinin dáleldegen. Áleýmettik baılanystyń jetispeýi aǵzadaǵy kúızelis gormonyn kóbeıtip, ımmýndyq júıeni álsiretedi. Osydan baryp uıqysyzdyq, qan qysymynyń kóterilýi, júrek-qan tamyrlary aýrýlary asqyna túsedi. Zertteýshilerdiń paıymynsha, bul máselemen kúresýdiń joly – ómirdegi shynaıy sátterdi baǵalaýdy úırený. Adamdar kóbine qymbat telefon, qymbat kıim, sońǵy úlgidegi kólik alyp, tym quryǵynda dámdi tamaq iship kóńilin kóterip, ózin baqytty sezingisi keledi. Biraq onyń qýanyshy kelte. Kıim tozady, aıfonnyń jańa modeli, kóliktiń odan da kúshtisi shyǵady. Sony alǵysy kep kóńil taǵy qulazıdy. Sondyqtan zertteýshiler adamdy shyn baqytqa jetkizetin – zattar emes, ómirden alǵan áser deıdi. Kornell ýnıversıtetiniń professory Tomas Gılovıch júrgizgen zertteýde adamdar satyp alǵan zattyń qýanyshynan góri saıahattaǵannan, mádenı is-sharalardan, dostarmen ýaqyt ótkizýden alǵan qýanysh áseri uzaqqa jetetini anyqtalǵan. Ýaqyt óte kele zattardyń máni joǵalady, al erekshe sátter estelikke aınalyp, adamǵa baqyt syılaıdy. AQSh ǵalymdary adamdarǵa «zattardy emes, sátterdi satyp alyńyz» degen keńes beredi. О́ıtkeni ortaq áńgime qarym-qatynasty nyǵaıtyp, shynaıy baılanysty kúsheıtedi.
Jalǵyzdyq – qazirgi zamannyń indeti. Biraq biz bir-birimizge rýhanı jaqyn bolýǵa umtylsaq, bul derttiń aldyn alýǵa bolady.
