BUU janynda AITV, JITS boıynsha birikken baǵdarlamany iske asyratyn uıym bar, ol IýNEIDS dep atalady. Osy uıym 40 jyldan astam ýaqyt ishinde medısınalyq qyzmetterge qol jetkizý jeńildegenine qaramastan, qoǵam stıgma (tańba basý), kemsitý, krımınalızasııa, qarjylandyrýdy qysqartý jáne saıası qysym sııaqty kóptegen qıyndyqtarǵa áli de tap bolyp otyrǵanyn málimdeıdi.
Sondyqtan Kemsitýshilikke qarsy kúres kúninde uıym úkimetterdi, donorlardy jáne seriktesterdi óz mindettemelerin oryndaýǵa jáne qoǵamdastyqtarǵa qoldaý kórsetýge shaqyrady.
«Stıgma, ıaǵnı aýrý juqtyrǵan adamnyń kemshiligin betine shirkeý qylyp basý – AITV-ınfeksııasynyń 4-shi satysyna ótý qaýpiniń ósýine ákeledi. Medısınalyq kómekpen qamtamasyz etý deńgeıin, sondaı-aq bilimge, jumysqa ornalasý qoljetimdiligin shekteıdi. Sol sebepti qoǵam kemsitýshiliktiń saldary aýyr bolatynyna nazar aýdarýy qajet», deıdi Shymkent qalasy JITS ortalyǵynyń bas dárigeri B.Syrbek.
Dárigerdiń aıtýynsha ár adamnyń quqyǵyn qorǵaý – ortaq mindet. Kemsitýshilikti toqtatýǵa árqaısymyzdyń kúsh-jigerimiz bar. Osy oraıda, joǵaryda atap ótkenimizdeı, Shymkent qalasynyń JITS-tiń aldyn alý jáne oǵan qarsy kúres ortalyǵy 1 naýryz – kemsitýshilik kúnine baılanysty is-sharalardy qolǵa aldy. Ol AITV-ınfeksııasy máseleleri boıynsha bilim deńgeıin arttyrýǵa, aqparattyq-tanymdyq túsinikti keńeıtýge baǵyttalǵan.
Mamannyń málimdeýinshe qalaı bolǵanda da AITV-men ómir súretin adamdarǵa qatysty kemsitýshilikke jol bermeýimiz kerek. Adamnyń densaýlyǵy qalaı qorǵalsa, onyń erki men quqyǵy da solaı qorǵalýy qajet.
ShYMKENT
