«Biryńǵaı platforma barlyq geologııalyq aqparatqa ashyq qol jetkizýge múmkindik beredi. Demek eldegi kez kelgen azamat atalǵan platformaǵa kirip, halyqtyń jerasty baılyǵy qalaı ıgerilip jatqanyn qadaǵalaı alady. Platformada 22 memlekettik qyzmet sıfrlandyrylǵan. Iske qosylǵannan beri 506 ótinim óńdeldi. Jer qoınaýyn paıdalanýdyń biryńǵaı platformasy kómegimen barlaýǵa nemese óndirýge ótinim berýden bastap, onyń aýksıony men lısenzııasyn berýge deıingi úzdiksiz úderis júzege asyrylady», dedi vıse-mınıstr Jánnat Dúbirova.
Platformada barlyq geologııalyq esepterdiń tizilimi, alǵashqy kitaptar, sonyń ishinde referat, esep mazmuny, grafıkalyq qosymshalar tizimi, jumys nátıjeleri, qorytyndylar, tujyrymdar, paıdalanylǵan ádebıetter tizimi, tegin onlaın sholý jáne oryndalǵan jumystardy túsiný úshin 60 000-nan astam esep bar.
Múddeli aýmaq týraly qajetti aqparatty alǵannan keıin paıdalanýshyǵa qoldanystaǵy lısenzııalar men kelisimsharttar, bos aýmaqtar, sondaı-aq aýmaqta júrgizilgen geologııalyq-geofızıkalyq barlaý jumystary týraly aqparat beriledi. Naqty qajetti geologııalyq materıaldardy satyp alý úshin jer qoınaýyn paıdalanýshylar Ulttyq geologııalyq qyzmettiń ınternet-resýrsynda ótinim beredi. О́tinim 5 jumys kúninen keshiktirilmeı óńdeledi.
Al biryńǵaı memlekettik qyzmettiń ınteraktıvti kartasyn bólek atap ótken jón. Sonyń arqasynda áleýetti jer qoınaýyn paıdalanýshylar ınfraqurylymnan bastap geologııalyq-geofızıkalyq esepterge deıin suralǵan aýmaqtyń tolyq beınesin ala alady. Interaktıvti karta jer qoınaýyn paıdalaný úshin alyp jatqan barlyq aýmaqty qamtıdy. Sondaı-aq aýksıonǵa qoljetimdi aýmaqtardy ornalastyrýǵa múmkindik beredi.
Júıede tıimdilik pen ashyqtyqty arttyrý maqsatynda qatty paıdaly qazbalar boıynsha berilgen lısenzııalar men kelisimsharttarǵa mindettemeniń oryndalýyn baqylaý úderisi sıfrlandyrylǵan. Buryn bul baqylaý qolmen júzege asyrylatyn.
О́nerkásip jáne qurylys mınıstri Qanat Sharlapaevtyń aıtýynsha, qazir elimizde jańa kómirsýtek ken oryndaryn ashýǵa múmkindik bar. Geologter shartty otynnyń boljamdy resýrsy shamamen 76 mlrd tonna bolatyn 15 shógindi basseındi bólip otyr. Búginde munaı-gaz óndirýdiń barlyq kólemi ıgerilgen 5 basseınge tıesili. Eń irisi – Kaspıı mańy. Onda resýrstyq bazanyń shamamen 80%-y bar.
2026 jyldyń sońyna deıin 2,2 mln sharshy shaqyrym aýmaqta geologııalyq-geofızıkalyq zertteý júrgizý josparlanǵan. Osy kezde mundaı zertteý kólemi 1255,6 myń sharshy shaqyrymdy quraıdy.
