Foto:Úkimettiń baspasóz qyzmeti
Kezdesý barysynda birlesken jobalardy júzege asyrý sheńberindegi yntymaqtastyq máseleleri talqylandy.
Aıta keteıik, 2024 jyldyń qorytyndysy boıynsha Bank respýblıkadaǵy jobalarǵa shamamen $1,4 mlrd bólgen.
«Jalpy alǵanda, sońǵy 3 jylda Banktiń elge salǵan ınvestısııalar kólemi $3,6 mlrd-ty qurady. Osylaısha, Qazaqstandaǵy jobalar úlesi bank portfelinde mańyzdy oryn alýyn jalǵastyryp jatyr», delingen habarlamada.
Nıkolaı Podgýzov 2025 jyly Bank sıfrlyq tehnologııalar men ınnovasııalyq sheshimderdi engizýge basa nazar aýdara otyryp, energetıka, kólik jáne ónerkásip salalaryndaǵy negizgi strategııalyq jobalardy qarjylandyrýdy jalǵastyrýǵa nıetti ekenin atap ótti.
Sonymen qatar bıyl EADB Qazaqstannyń Ortalyq jáne Shyǵys óńirindegi JEO-ny keńeıtý jáne jańǵyrtý, polıetılen óndiretin zaýyt qurylysy, qýaty 545 MVt «Altyn Dala» kún elektr stansasyn salý sııaqty áleýmettik mańyzy bar jobalarǵa ınvestısııa salýdy josparlap otyr.
Premer-mınıstr Qazaqstannyń, ásirese energetıka, ınjenerlik jáne kommýnaldyq ınfraqurylym salalaryndaǵy yntymaqtastyqty odan ári keńeıtýge múddeli ekenin atap ótti.
«Eýrazııalyq damý banki – Qazaqstannyń mańyzdy seriktesi. О́tken jyly ekonomıkamyzǵa tartylǵan ınvestısııa kólemi shamamen 40%-ǵa artty. Banktiń Qazaqstandaǵy nesıe portfeli jalpy kólemniń 63,4%-yna deıin ósti. Biz Bankpen ózara tıimdi sharttarda yntymaqtastyqty odan ári keńeıtýge múddelimiz. Sondaı-aq biz ózara is-qımyldyń dástúrli jáne jańa baǵyttarynyń áleýetin ashýǵa nıettimiz», dedi Oljas Bektenov.
