Foto: Úkimet
Qýaty 3 mln tonna bolat óndiretin metallýrgııa jobasyn qytaılyq ınvestorlar $1,2 mlrd-qa baǵalap otyr, joba sheńberinde 2,5 myń jumys orny ashylady. Qurylys 2025 jyldyń sáýir aıynda bastalady dep josparlanǵan.
Úkimettiń málimetinshe, ınvestordyń josparyna sáıkes, 2027 jyly bastalatyn birinshi kezeńde óndiris qýaty 1 mln tonna bolatty qurasa, al ınvestısııa kólemi 160,2 mlrd teńgege jetedi. 2029 jylǵa qaraı ónim shyǵarý 3 mln tonnaǵa deıin artyp, qosymsha ınvestısııa kólemi 312,8 mlrd teńge bolmaq. О́ndiriske qazaqstandyq shıkizat: Qaraǵandy, Qostanaı jáne Ulytaý oblystarynda óndiriletin tabıǵı gaz jáne temir rýdalary, sondaı-aq áktas paıdalanylady. Nátıjesinde, kásiporynda katanka, armatýra, qubyr óndirisine arnalǵan jolaqty bolat, sondaı-aq buryshty jáne profıldi bolat sııaqty ónimderdiń keń aýqymyn shyǵarý josparlanyp otyr. Jobany iske asyrýdyń ekinshi kezeńi aıasynda metallýrgııa zaýytynyń qajettilikterin qamtamasyz etý úshin qýaty 350 MVt gaz týrbınaly elektr stansasyn salý josparlanǵan, oǵan ınvestor 201,3 mlrd teńge qarjy bóledi.
Fujian Hengwang Investment Co Ltd kompanııasynyń basqarma tóraǵasy Szen Chjaosıan kásiporynda temirdi tikeleı qalpyna keltirý tehnologııasy (DRI) engiziletinin, bul onyń ónimdegi joǵary quramyn – 90%-dan astamdy qamtamasyz etetinin jáne qazaqstandyq metallýrgııanyń básekege qabilettiligin arttyratynyn basa aıtty.
Premer-mınıstr Oljas Bektenov atalǵan joba otandyq metallýrgııany damytýǵa, óndiris qýatyn arttyrýǵa jáne elimizdiń eksporttyq áleýetin keńeıtýge mańyzdy qadam bolatynyn atap ótti.
«Jobanyń biz úshin mańyzy zor. Bul – elimizdiń eksporttyq múmkindikterin keńeıtýge jol ashatyn mańyzdy baǵyt. Investısııalyq jobalardy jedel iske asyrý úshin Qazaqstan Úkimeti janynan Investısııalyq shtab jumys isteıdi. Úkimet sizdiń josparlaryńyzdy tolyǵymen qoldaıdy jáne olardy júzege asyrý úshin tıisti qoldaý kórsetedi», dedi Oljas Bektenov.
