Kórmege maıdangerlerdiń fotoqujattary, marapattary men jeke zattary qoıylǵan. Onyń ishinde atqysh-ushqysh, kishi serjant Baqtyoraz Beısekbaevtyń marapattary, Brest qamalynyń qabyrǵasynan alynǵan kirpish fragmenti, T.Bıgeldınov, S.Lýganskıı, M.Ǵabdýllın, S.Nurmaǵambetov, A.Hýsaınov, T.Qaýmbaev sekildi dańqty jaýyngerlerdiń jeke muraǵattarynan alynǵan fotoqujattar birden nazar aýdartady.
Kórneki beıneler men jeke oqıǵalar arqyly soǵys qaharmandaryn urpaq jadynda áldılegen kórme surapyl jyldardyń susty kartınasyn kóz aldyńa ákeledi. Árbir fotosýret Jeńiske úles qosqan jeke adamnyń, meıli ol sarbaz, tyl eńbekkeri nemese lager tutqyny bolsyn, ózindik bir jeke taǵdyryn ashady. Kórmeniń taqyryby ár sýrettiń artynda naqty ómir, synaqtar men erlikter jatqanyn aıshyqtap, ótken men búginniń arasyndaǵy baılanysty kórsetedi.
Kórmeni ashqan Memlekettik Ortalyq mýzeı dırektorynyń orynbasary Serjan Barahanuly «Er esimi – el esinde» jalpyrespýblıkalyq mýzeılik aksııasy aıasynda uıymdastyrylǵan is-sharalar aldaǵy kúnderi de óz jalǵasyn tabatynyn jetkizdi. Sondaı-aq is-shara barysynda kórme qonaqtary jýrnalıst, tarıhshy, Ál-Farabı atyndaǵy QazUÝ ýnıversıtetiniń professory Láıla Ahmetova, MOM arhıviniń dırektory Sábıt Shildebaev, sonymen birge UOS ardagerleriniń urpaqtary sóz sóılep, qan maıdanda erlik kórsetken batyrlardyń eren erligi urpaq sanasynda máńgi jańǵyratynyn atap ótti.
ALMATY
