Sonymen qatar 19 kúdikti ustalyp, zańsyz aınalymnan 80 kelige jýyq esirtki zaty tárkilendi.
«Eń iri qylmystyq isterdiń biri Qyzylorda oblysynda anyqtaldy. Munda 46 jastaǵy er adam – jasyryn esirtki zerthanasynyń uıymdastyrýshysy jáne onyń týystary ustaldy. Olar elıtalyq suryptaǵy qarasorany zańsyz ósirip, esirtki zattaryn iri kólemde saqtap, satýdy josparlaǵan. Jedel is-sharalar barysynda polısııa qyzmetkerleri kúdiktiniń bitpegen úıinde fıtozerthanany anyqtady. Ol jyl boıy ósimdik ósirýge qajetti jaryqtandyrý, jeldetý jáne sýarý júıelerimen jabdyqtalǵan. Arnaıy operasııa nátıjesinde 19 keliden astam «gollandtyq qarasora» tárkilendi», dedi IIM esirtki qylmysyna qarsy is-qımyl komıteti tóraǵasynyń orynbasary Danııar Meıirhan.
Jyl basynan beri Qazaqstanda 42 esirtki zerthanasy joıyldy, 45 kúdikti ustaldy. Zańsyz aınalymnan 100 keliden astam esirtki jáne 5 tonnadan astam prekýrsor – esirtki óndirisine qajetti hımııalyq zattar tárkilendi.
