Blısten eki dúrkin álem chempıony, rapıdten álem birinshiliginiń kúmis júldegeri jáne Azııa chempıony degen ataǵy bar qazaq qyzy týrnır barysynda birde-bir ret jeńiske jete almady. Monakoda Bıbisara toǵyz kezdesýdiń úsheýinde utylyp, alty ret teń tústi. Nátıjesinde nebary 3 upaı jıǵan ol eń sońǵy 10 orynda qalyp qoıdy. Bul jarysta Aleksandra Gorıachkınanyń baǵy jandy. FIDE-niń týy astynda óner kórsetken 26 jastaǵy Reseıdiń ókili qatysýshylar arasynan eń kóp upaı jıyp, bas júldeni oljalady.
Joǵarydaǵy sátsizdiktiń saldarynan Asaýabeva bas tuǵyrdan taıdy. Osyǵan deıingi eki kezeńiniń qorytyndysy boıynsha ol jarys kestesinde kósh bastap turǵan edi. Qorjynynda 197.5 upaıy bar Bıbisara ekinshi orynǵa syrǵyp tústi. Kósh basyna Aleksandra Gorıachkına shyqty. Orynbor oblysynyń týmasy 236.67 upaıdy enshileýde. Úzdik úshtikti qytaılyq Tan Chjýnı (170 upaı) túıindep tur. Endi álemdik Gran-prı dodasynyń tórtinshi kezeńi 14-25 naýryz aralyǵynda Kıprde ótedi.
