Osyǵan deıin ótkizilgen jármeńkelerde qurylysshy men kommýnaldyq salaǵa qajetti mamandarǵa suranys kóp bolypty. Bul joly da júk kólikteri júrgizýshilerin, qurylys materıaldaryn daıyndaıtyn epti mamandardy izdegender az emestigi baıqalady. Ár mekemeden kelgen ókilder jumys izdegen jandarǵa kásip jaıly tolyq málimet berip, olarǵa jasalatyn jaǵdaı týraly da aıtyp ótti.
«Jármeńkelerge únemi qatysyp, mamandardy shaqyramyz. Osy joly avtokólik, jol tegisteıtin kólik júrgizýshilerin izdep kelip otyrmyz. Bizde jumys isteýge bar jaǵdaı jasalǵan. Yntaly jastardy ári qaraı oqyp, mamandyǵyn jetildirýge múmkindik beremiz», deıdi «Avtomobıl joldary basqarmasy» JShS-nyń ókili Ásem Baıulova.
Qurylys materıaldaryn óndiretin «Qurylys» AQ ókili beton jasaıtyn maman izdep kelipti. «О́ndiris avtomattandyrylǵan, jumysshylardy tasymaldaý jolǵa qoıylǵan. Jalaqy ýaqtyly tólenedi, basqa da áleýmettik qoldaýlarymyz bar», deıdi ol.
Bul jolǵy jármeńkeniń bir ereksheligi – zańgerler qatysýshylarǵa «Qaryzsyz qoǵam» jobasy aıasynda qarjy únemdeý, nesıesin tóleı almaǵandyqtan buǵattalǵan esep shotyn qaıta ashý, bankrottyqqa ótinish berý boıynsha tegin keńester berdi.
«Byltyr qala boıynsha 2302 adam qarjy saýatyn arttyrdy. Bıyl da jalǵasatyn joba aıasynda 3 myńnan astam turǵyndy oqytý josparlanyp otyr. Onyń barysynda zańger, bankır, basqa da sala ókilderinen jasaqtalǵan jobalyq keńse qaryzy kóbeıgen turǵyndardyń kestelerin jeńildetip, jaǵdaılaryna qaraı ózgertip beredi», deıdi «Amanat» partııasy qalalyq fılıalynyń atqarýshy hatshysy Gúlshat Musaeva.
Qalalyq jumyspen qamtý jáne áleýmettik baǵdarlamalar bóliminiń basshysy Kenjegúl Quraqbaevanyń aıtýynsha, mundaı jármeńkeler jyl boıyna turaqty ótkiziledi.
QYZYLORDA
