Sýret: asu.edu.kz
Tulparynyń tuıaǵymen jumyr jerdiń betin dúbirletken ór rýhty jurtymyz sońǵy eki-úsh ǵasyrda aýmaly-tókpeli nebir qıly taǵdyrdy bastan keshti. Álem damýdyń dańǵyl súrleýin taýyp, «aıshylyq alys jerlerden, jyldam habar alǵyzyp jatqan» zamandarda aısyz túnde jol tappaı basymyzdy taýǵa da, tasqa da soqtyq. Aspanymyzdy qara bult torlaǵan kezeń jetip, jońǵarmen jaǵalasyp júrip, aıaǵymyzdy alyp ımperııalardyń qurǵan tuzaǵyna ilýge májbúr boldyq. Osylaı, azattyqtyń tizgini qolymyzdan sýsyp tústi. Sýsyp tústi de, bodandyqtyń tar qamyty qazy moınymyzdy qajady. О́z jerinde júrip, ógeılik kórdi. Tike sóılese – qamaldy, bas kóterse – atyldy. Otarlaýshy kúsh bodan eldiń qarapaıym qarasyna oq shyǵyndaýǵa sarańdyq tanytyp, Saryarqanyń dalasyndaǵy jazyqsyz jurtty ashtyqpen qyrdy.
Biraq qazaq azat kúnge degen ańsaryn sýytpady. Tek ańsaǵan joq, sol shadyman shaqqa máńgilikke en salmaq úshin egeýli naıza qolǵa alyp, eńký-eńký jer shalyp, tebingisin terige shiritti. Er tósekten bezinip, temirqazyq jastanyp júrip, úsh júzden asa ult-azattyq kóterilis jasap, uly qurbandyqtar berdi. Azat kúnge umtylǵan myńdaǵan esil erdiń tókken qany men shyqqan jany tek ketpeı, saryla, sarǵaıa kútken táýelsizdikke qol jetkizdik.
Ǵasyrlar boıy kórgen óz taqsiretinen sabaq alǵandyǵynan bolar, qazaq ózgege óktem sóılegen joq. Aǵa bolyp, bılep-tóstemedi. Bılik qolyma tıdi eken dep tizesin batyrmady. Kerisinshe, «jaqsylyq ekken alǵys orady» támsiline ıek artyp, ata-babamyzdyń naızanyń ushymen, bilektiń kúshimen qorǵaǵan jeriniń omyraýyn tel emgen júzdegen dıaspora ókilderiniń mańdaıynan ópti. Qazaq atty alyp báıterekti saıalaǵan jurttyń jel jaǵyna shyǵyp, yqtasyn boldy. Olardyń mádenıeti men salt-sanasyn saqtaýǵa oraı týǵyzyp, barsha taǵdyrlastyń basyn qosatyn, ǵalamda joq Qazaqstan halqy Assambleıasy atty shańyraq kóterip berdi. Sóıtip, osydan dál otyz jyl buryn, kóktemniń alǵashqy kúni, ıaǵnı 1 naýryzda ýyǵy birlik dep qadalyp, esigi yntymaqqa ǵana ashylatyn keregesi keń, terezesi teń tynyshtyqtyń ordasy dúnıege keldi.
Sodan beri memleket quraýshy ult pen elimizdegi etnostardyń bári bir úıdiń balasyndaı tatý-tátti ǵumyr keship keledi. Assambleıa eldik murat jolynda azat el buqarasynyń bir jaǵadan bas, bir jeńnen qol shyǵarýyna uıytqy bola bildi. Osyny tereń túısingendikten de Assambleıanyń qurylyp, kindigi kesilgen kún jalpy halyqtyń tarıhı máni bar dataǵa, Alǵys aıtý kúni merekesine aınaldy.
Qazir Uly dala tósinde kógildir aspan tústes ádilettiń týyn jelbiretken memleketimiz úshin bul meıram – qurmet pen senimniń, meıirim men izgiliktiń merekesi retinde toılanyp keledi. Bul – «at basyna kún týyp, aýyzdyqpen sý ishken» qıyn-qystaý kezeńdi eske alyp, táýelsizdikten keıingi jyldarda yntymaq pen birliktiń arqasynda jetken tolaǵaı tabysqa marqaıatyn kún.
Endeshe, tolǵamdy sózdiń tobyqtaı túıini – kóptiń alǵysynyń kógerterine senelik. О́tkenge salaýat aıtyp, búginge táýbe etip, bolashaqqa úmit artyp, bir-birimizge alǵys jaýdyrýǵa asyǵaıyq!
