О́ńirdiń segiz júırigi men elimizdiń ár qıyrynan kelgen segiz aqyn synǵa túsetin format bıyl birshama ózgeripti. Bul joly aqyn atyndaǵy óńirden tórt úzdik aıtysker topqa tússe, basqa oblystardan on aqyn jyr alamanynda baq synaýǵa múmkindik aldy. Jeti jupqa jiktelgen aıtys aqyndarynyń ónerin esimi elimizge belgili qalamgerler baǵalady. Eldik pen birlikti, tatýlyq pen kisilikti jyrlaǵan jyr júırikteriniń sóz saıysy ádettegideı ádemi ázildermen ádiptelgeni kórermen úshin úlken olja boldy.
Balasaǵun atyndaǵy ortalyq konsert zalynda shymyldyǵy túrilgen aıtysty shyǵystyń eki aqyny Rústem Qaıyrtaı men Serik Qýanǵan bastap berdi. Shyǵys Qazaqstan oblysynan kelgen Serik Áýlıeata óńiriniń tereń tarıhy men búginin shyraıly shýmaqtarymen shynaıy jyrlasa, talaı aıtysta top jarǵan Abaı oblysynyń aqyny Rústem Qaıyrtaı da qarsylasynan bir mysqal kem túsken joq. Jaıyqtyń jaǵasynan kelgen qazaqtyń erke qyzy Jansaıa Mýsına men jambyldyq Áset Dúısebaev arasyndaǵy sóz saıysy ádemi ázilmen ádiptelip, kópshiliktiń kóńilin kóterdi.
Jalpy alǵanda, jeti jupta synǵa túsken aıtyskerlerdiń qaı-qaısysy bolsyn jaqsy daıyndyqpen kelgeni baıqalyp turdy. Jyltyr sózden jyraq bolǵan aqyndardyń ózara sóz qaǵystyrýy, jyr alyby Jambyldyń beınesin, eńbegi men erligin qara óleń ólshemine syıdyrýǵa tyrysýy tyńdarmannyń júregine jetti deýge bolady.
Jyr dodasynyń qorytyndysynda sóz alǵan qazylar alqasynyń tóraǵasy Júrsin Erman Áýlıeata tórinde dástúrli túrde uıymdastyrylyp kele jatqan «Jambyl – meniń jaı atym, halyq – meniń shyn atym» atty respýblıkalyq aıtystyń joǵary deńgeıde ótkenin atap ótti.
«Taraz tórinde joǵary deńgeıde uıymdastyrylǵan jyr dodasyna kýá boldyq. Aıtysqa qatysqan aqyndar jyr alyby týraly tamasha shýmaqtarymen daralanǵanyn aıta ketken jón. Bir sózben aıtqanda, júırik aqyndarymyz taqyrypty barynsha ashýǵa tyrysyp baqty. Respýblıkalyq aıtysty turaqty túrde ótkizip kele jatqan jergilikti atqarýshy bılikke alǵys aıtamyz. Qazaqtyń qasıetti óneri máńgi jasasyn», dedi ol óz oıyn túıindep.
Áýlıeata tórinde ótken alaman aıtystyń qorytyndysynda bas júlde (1 mln 700 myń teńge) Shyǵys Qazaqstan oblysynyń aqyny Serik Qýanǵanǵa buıyrdy. Al júldeli birinshi orynǵa Syr óńiriniń júırigi, belgili aıtysker Muhtar Nııazov laıyq dep tanylsa, Batys Qazaqstan óńirinen kelgen Jansaıa Mýsına ekinshi, astanalyq Muhtar Qonarbaev úshinshi oryn ıelendi. Buǵan qosa tórt arnaıy júlde óz ıesin tapty. Baýyrjan Momyshuly atyndaǵy júlde almatylyq Shuǵaıyp Sezimhanǵa, Ulbıke aqyn atyndaǵy júlde jambyldyq Áset Dúısebaevqa, Kenen Ázirbaev atyndaǵy júlde abaılyq Rústem Qaıyrtaıǵa, Ázimbek Janqulıev atyndaǵy júlde pavlodarlyq Raýan Qaıdarǵa buıyrdy.
Respýblıkalyq aıtystyń qorytyndysynda sóz sóılegen oblys ákiminiń birinshi orynbasary Nurjan Kalenderov Taraz tórinde tamasha óner kórsetken aıtysker aqyndarǵa, olardyń ónerine baǵa bergen qazylar alqasynyń múshelerine alǵys aıtty.
«On jyldan astam ýaqyt boıy turaqty túrde uıymdastyrylyp kele jatqan jyr alamany kópshiliktiń kóńilinen shyqty degen oıdamyz. Elimizdiń ár qıyrynan kelgen tanymal aqyndardyń tamasha shýmaqtaryna jergilikti kórermen dán rıza bolyp, qoshemet kórsetkenin kóz kórdi. Sol úshin osy aıtysqa arnaıy kelgen júırikterimizge shyn júrekten rızashylyǵymdy bildiremin. Atadan balaǵa mıras bolyp jalǵasqan qazaqtyń qasıetti óneri jasaı bersin», dedi ol.
Jambyl oblysy
