Naýryz jańasha sıpat aldy
Byltyrdan bastap Naýryzǵa jańasha túr berý bastamasy kóterildi. Ony barlyq qaýym qoldady. Byltyr «Senimen bolashaq» respýblıkalyq ata-analar qoǵamdyq birlestigi Ulystyń uly meıramyn jańa mazmunda toılaýdy bastady. Bul Prezıdenttiń merekeniń mańyzyn arttyryp, rýhanı qýatyn zamanaýı túrde jańǵyrtý týraly suhbatyna dóp tústi. Memleket basshysynyń usynysyn is júzine asyrýdyń joly Naýryz meıramyn azamattyq merekege aınaldyrý ekenin túsingen birlestik tolyq júıelengen mańyzdy «SenBolNaýryz» baǵdarlamasyn ázirledi. Munda meıramǵa barlyq adam qatysady.
Sondaı-aq adamnyń ultyna, tiline, senim-nanymyna qaramastan, aıtýly merekeniń tálimdik ári tárbıelik mazmunyn ashyp kórsetip bere alatyn «Jańarý» men «Ádepti órkenıet» qundylyqtaryna laıyqty mádenı is-sharanyń rýhanı negizi men uıymdastyrý júıesi naqtylandy. Osy arqyly Naýryz merekesi jalpyulttyq biregeılik pen azamattyq ustanymǵa negizdeldi.
Memleket basshysy Qasym-Jomart Toqaev byltyr Atyraý atyrabynda ótken «Adal adam – Adal eńbek – Adal tabys» atty Ulttyq quryltaıda kóptegen eldik máseleni sóz etti. «Endigi másele – ulttyq biregeıligimizdi nyǵaıtý. Men «Egemen Qazaqstan» gazetine bergen suhbatymda Ulystyń uly kúnin búkil el bolyp jańasha atap ótetinimizdi aıttym. Jaqynda osyǵan baılanysty arnaıy tujyrymdama qabyldandy. Árıne, búkil álem jurtshylyǵymen birge qarsy alatyn Jańa jyl merekesinen bas tartpaımyz. Biraq áz Naýryzdyń mártebesin kóterip, mazmunyn baıyta túsemiz. Mysaly, kórisý kúninen bastalatyn meıram kezinde ár kúnniń óz ataýy bolady. Sonyń biri Ulttyq kıim kúni dep atalady. Basqa jurt qazaqty kıiminen tanıtyn bolýy kerek», dep aıtqan edi. Mádenıet jáne aqparat mınıstrligi Memleket basshysynyń tapsyrmasy aıasynda «Naýryz meıramyn toılaý tujyrymdamasyn bekitý týraly» Úkimet qaýlysyn ázirledi. Sóıtip, Qazaq eli ulyq merekeni 10 kún toılaıtyn boldy.
Zamanaýı sıpat
Jańa jylda Aıaz ata balalarǵa syılyq beredi. Bul osy merekeniń mańyzyn arttyra tústi. Ádemi dástúrge aınaldy. Jańa jyldy halyqqa barynsha jaqyndatty. Naýryz merekesinde de osyndaı dúnıeler bolsa, kánekı! Ásirese balalardyń esinde qalatyn tosynsyılar jasasaq, qandaı ǵanıbet! Sondyqtan Naýryzdy jańasha toılaý arqyly merekede atqarylatyn salt-dástúr, tanym-uǵymdardy úlgi-ónege beretin tálim-tárbıelik formatqa negizdeı alý kerek. «Senimen bolashaq» usynǵan taǵy bir jol – Naýryzdyń kúntizbelik jańa jylmen baılanystyrylýy.
31 jeltoqsanda túngi saǵat 24:00-de kúntizbe boıynsha keler jyl bastalsa, Naýryzdyń 22-sinde jańa kúndi qarsy alý dástúrin qaıta túletsek deımiz. Atqan tań men keler kúnge úmitpen qaraǵan adamzat bar tirshilik jańaratyn Naýryzdy jaqsylyqqa nıet etip bastasa, úlken de, kishi de rıza bolary haq. Jańa jyl – Naýryzdy qarsy alý osy qasıetimen de basym bolyp tur.
Otshashýdyń ornyn shashý tolyqtaı almastyra alady. Qýanyshtyń aıǵaǵy retinde jasalatyn saltanatty dástúrdiń ereksheligi – ár tátti de (shashýda) «Senimen bolashaq» ujymynyń aq tilekteri jazylady.
Sondaı-aq tańǵy astyń yqshamdalǵan úlgisin ázirleý – baǵdarlamadaǵy negizgi basymdyqtyń biri. Tańǵy as kúni boıy kúsh-qýat pen jiger berip qana qoımaı, qunarlylyǵymen uzaq ýaqyt ashtyqty sezindirmeıdi. Jent, talqan, balqaımaq, kilegeı, súzbe, ýyz, irimshik sekildi qunarly taǵamdar qoıylǵan tańǵy as belsendi qımyl-qozǵalystyń kepili ǵana emes, aǵzanyń kúni boıy alatyn kalorııalyq qýatyn tıimdi paıdalanýǵa jol ashady.
Eńbek sheberhanasy – adam ómiriniń negizi. Eńbek – adamdy materıaldyq ári moraldyq ta damytý quraly. Qazirgi alfa urpaqqa eńbek qundylyǵyn dáripteýde Naýryz meıramy taptyrmas qural. Memleket basshysy Qasym-Jomart Toqaev 2025 jyldy «Jumysshy mamandyqtary jyly» dep jarııalaýy beker emes. Joǵary baǵalanýǵa tıis eńbek adamynyń qadir-qasıetin arttyrý arqyly jastardy tárbıeleý ustanymy jatyr.
«Koje time» – Ulystyń uly kúni daıyndalatyn as. Naýryz kójeniń adam aǵzasyna berer qýaty men nári bólek. Quramyna jeti túrli dám qosylyp daıarlanatyn kójeni qazan tolyp, aq mol bolsyn degen nıetpen birlestik qyzmetkerleri birlese daıarlaıdy.
«Tree of life» – kóktemmen birge kelip, kóńildi kóriktendiretin meıramdy jańasha merekeleýdiń jobasyna birlesip aǵash otyrǵyzý da engizildi. Bul – sabaqtastyqtyń, jańa ómirdiń, tabıǵatpen etene jaqyndyqtyń jáne jahandyq ekologııalyq qozǵalysqa qosqan úlestiń úlgisi. Budan bólek, jańa jylda shyrshalardy kesip, tabıǵatqa zalal keltirse, Naýryzda kerisinshe, «bir tal kesseń, on tal ek» qaǵıdasyn berik ustanyp, elimizdi kógaldandyrýǵa úles qosady.
Sondaı-aq Anaǵa taǵzym – bizdiń birlestik mıssııasynyń biri. Bul ata-ana mádenıetin qalyptastyrý bolǵandyqtan, úlkenge – qurmet, kishige – izet kórsetken dala fılosofııasy. Osy ıdeıa «SenBolNaýryz» tujyrymdamasynda berik oryn alǵan.
Birlestiktiń azamattyq ustanymy retinde bastalǵan bul úrdis qoǵamda qoldaý taýyp, beleń alsa, qoǵamnyń utary mol.
Nurken ASANOV,
«Senimen bolashaq» respýblıkalyq ata-analar qoǵamdyq birlestiginiń quryltaıshysy
