Byltyr kúzde 180 metrlik jańa murjanyń qurylysy támamdaldy. Ony paıdalanýǵa berý bıylǵy kúzge belgilengen. Qurylys-montajdaý jumystaryn otandyq «Qazjylýqurylys» JShS men Aýstrııanyń «GrunBau» fırmasy atqaryp shyqty.
Jýyrda oblys ákimdiginiń otyrysy bolyp, onda qystyń aıaqtalyp qalǵanyna baılanysty jylý ortalyǵy jumysynyń búgingi jaıy talqylandy. Basshylyqtyń úsh jyl burynǵydaı taǵy da naýryzda tótenshe oqıǵa bolyp qalmasyn degen saqtyq jasap jatqany kórinip tur. Energetıka jáne TKSh basqarmasynyń bastyǵy Qýandyq Shaqybaevtyń aıtýyna qaraǵanda, JEO-2 qazir qalypty jaǵdaıda. Segiz qazandyq agregaty men alty qubyrlyq agregat jumys istep tur. Rezervte 2 qazandyq pen 1 qubyrlyq agregat bar. Taǵy bir qazandyqqa kúrdeli jóndeý júrgizilip jatyr.
Sóıtip, Qýandyq Shaqybaev oblys basshylaryn jáne halyqty tynyshtandyryp qoıdy. Sonymen qatar ol ótken jazda byltyrǵy tasqyn búldirgen 53 kılometrlik joǵary voltti elektr júıeleri jáne 737 tirek baǵanalarynyń jóndelgenin aıtty. Al Jambyl, Jumabaev, Tımırıazev, Ýálıhanov jáne Shal aqyn aýdandarynda 7 blokti-modýldi qazandyqtar ornatylǵan. Solardyń kómegimen aýdan ortalyqtaryndaǵy 20 kópqabatty úıge jylý turaqty berilip turǵan. Al bıyl Aıyrtaý aýdanynyń ortalyǵy Saýmalkól men Ǵ.Músirepov aýdanynyń ortalyǵy Novoıshımka aýyldarynda ortalyqtandyrylǵan jylý júıeleri iske qosylmaq. Osyndaı jumystardy Aqjar aýdanynyń ortalyǵy Talshyqta da qolǵa alý josparlanǵan.
О́ńir aýmaǵy asa úlken bolmaǵanymen elektr energetıkasyn kóp óndiredi, sáıkesinshe kóp tutynady. Búginde elektr jáne jylý qýatyn óndiretin 24 ortalyq qazandyq jumys istese, bulardan basqa 466 avtonomdy jumys isteıtin qazandyqtar bar.
Otyrys barysynda oblys boıynsha energetık mamandardyń jetispeýshiligi de aıtyldy. Qazir salada 550 bos jumys orny bar. Ásirese ınjener energetıkterdiń tapshylyǵy qatty seziledi deıdi oblys ákimi.
Jýyrda oblysqa buryn osynda oblys ákiminiń orynbasary qyzmetin atqarǵan Ǵanı Nyǵmetov issaparmen kelip, qazir ózi rektory bolyp isteıtin Almaty energetıka jáne baılanys ýnıversıtetine jastardy shaqyrǵan edi. Birneshe oqý ornynda túlektermen kezdesip, energetıka ýnıversıtetiniń tabysy men jetistigin áńgimelegen. Ol tipti óz atynan oblysqa 50 grant bóletinin de málimdegen. Bul soltústiktiń energetık kadrlary máselesin sheshýge súbeli úles bolary sózsiz.
О́ńir basshysy energetıka salasynyń jumysshy mamandaryn daıarlaý jumysyn jandandyrý máselesine nazar aýdarady.
«Bıylǵy «Jumysshy mamandyqtar jyly» sheńberinde elektrmonter, elektrslesar, dánekerleýshi mamandyqtaryn daıarlaýdy arttyrýdy tapsyramyn», dedi Ǵaýez Nurmuhambetov.
Soltústik Qazaqstan oblysy
