Tusaýkeser kezdesýlerinde Aleksandr Býblık (ATR №82) japonııalyq Iýsýke Vatýnakıge (ATR № 349) jáne Aleksandr Shevchenko (ATR № 98) aýstralııalyq Rınkı Hıdjıkataǵa (ATR № 83) ese jiberdi. Qos qyzymyz jarysty ekinshi kezeńnen bastady. Iýlııa Pýtınseva (WTA № 20) chehııalyq Katerına Sınıakovaǵa (WTA № 59) jarytyp qarsylyq kórsete almady – 2:6, 2:6.
Elena Rybakına (WTA № 7) áý basta fransııalyq Sıýzan Lammenske (WTA № 64) san soqtyrdy – 6:3, 6:3. Odan keıin ulybrıtanııalyq Ket Býltermen (WTA № 38) kezdesti. Bul básekede de Rybakına óz qarsylasynan basym tústi. 1 saǵat 16 mınýtqa sozylǵan saıys 6:0, 7:5 esebimen aıaqtaldy. 1/8 fınalda ol álemniń 11-raketkasy, reseılik Mırra Andreevamen kúsh synasady. Elimizdiń eń úzdik tennısshisi dál osy oıynshymen osydan úsh apta buryn Dýbaıdaǵy dodanyń jartylaı fınalynda sheberlik baıqasty. Ol kezdesýde Andreevanyń asyǵy alshysynan túsken edi. Bul joly da Rybakınanyń 17 jasar qarsylasyna áli jetpedi – 1:6, 2:6.
Indıan-Ýellstegi týrnırdiń alǵashqy aınalymdarynda tosyn nátıjeler de tirkeldi. Eń basty sensasııa – Serbııanyń dańqty tennısshisi Novak Djokovıch oıda-joqta ATR tiziminde 85 orynda turǵan Nıderlandtyń ókili Botık van de Zandshýlpten 2:6, 6:3, 1:6 esebimen utyldy. Sondaı-aq, 2021 jylǵy US Open dodasynyń jeńimpazy, ulybrıtanııalyq Emma Radýkaný japonııalyq Moıýka Ýchıjımadan jeńildi – 3:6, 2:6. Álemniń ekinshi raketkasy, germanııalyq Aleksandr Zverev Qyzǵaldaqtar eliniń taǵy bir oıynshysy Tallon Grıkspýrge jol berdi – 6:4, 6:7, 6:7.
