KTK jazǵandaı, Qaraǵandyda 46 kenshiniń ómirin jalmaǵan jarylysqa qatysty basty sot prosesinde osyndaı tyń aqparattar aıtyldy.
Tergeý málimetinshe, Kostenko shahtasynyń dırektory qarapaıym qaýipsizdik erejelerin esten shyǵarǵan. Jer qyrtystarynan bólinetin metan gazy men kómir shańy ár jerden bir tutanyp turǵan. Ony kenshiler óz kúshimen sóndirip júrgen.
Sonymen qatar shahta astyndaǵy jumysqa jaramaıtyn qurylǵylardy satyp alyp, ony bilikti mamandar emes, kenshilerdiń ózi ornatqan. Osylaısha ár tıyndy únemdep kelipti.
Al kómir óndirý kólemi jospardan asyp ketken. Sotta prokýrorlar osyndaı uzyn-sonar zańbuzýshylyqty tizip shyqty.
Aıta keteıik, 2023 jyldyń 28 qazanynda Kostenko atyndaǵy shahtada apat boldy. Aldymen konveıerden shyqqan ushqynnan kómir shańy tutanyp, oǵan metan gazy aralasyp alapat jarylys boldy. Jarylys kúshi alty shyqyrymǵa jaıylǵan. Sol kezde shahtada bolǵan 252 kenshiniń 46-sy kóz jumdy.
«Arty aýyr apatqa ákeletin jaǵdaıdyń baryn, kenshilerdiń ómiri men densaýlyǵyna qaýip tóndergenin bilse de, jospardy oryndaý úshin №48 lavada jumys bir sátke de toqtatylmaǵan. Ol jerde órt ara-tura tirkelip turǵan. Shahta dırektory men oǵan baǵynyshty basshylar qaýipsizdik sharalaryn saqtaýǵa qulyq tanytpaǵan», - deıdi memlekettik aıyptaýshy Ádil Sadyqov.
