Baljan qazirgi kezde Shyǵys Qazaqstan oblysy, Kúrshim aýdany, Qaınarly aýylyndaǵy Prıvolnoe orta mektebinde bastaýysh synyp muǵalimi. Onyń ómirlik ustanymy – Ál-Farabıdiń: «Adam maqsatyna ózin-ózi jetildirý arqyly jetedi», degen sózi.
«Ustaz zaman talabyna saı árdaıym izdeniste bolyp, óz bilimin jetildirip, damytyp otyrýǵa tıis», deıdi Baljan. Ol oqýshylardyń zertteý qabiletin arttyryp, olardy túrli baıqaýǵa daıyndaýǵa erekshe kóńil bóledi. Onyń jetekshiligimen oqýshylary «Zerde» baıqaýynda júldeli oryndar ıelengen.
«Shákirtterim jyl saıyn mektepishilik, aýdandyq, oblystyq, respýblıkalyq olımpıadalarda júldeli oryndarǵa ıe bolady. Bul – olardyń tynymsyz eńbeginiń nátıjesi. Ár balanyń boıyndaǵy erekshe qabiletti ashý, bilimge degen qushtarlyǵyn oıatý – ustazdyq jolymdaǵy basty maqsatym», deıdi pedagog.
Ol shákirtterine bilimmen qatar, ulttyq tárbıe berýdi de mańyzdy sanaıdy. «Sabaqtarymda balalardyń boıyna ulttyq qundylyqtardy sińirip, týǵan jerin qadirleıtin, qazaqtyń baı murasy men mádenıetin qurmetteıtin azamattardy qalyptastyrýǵa tyrysamyn», deıdi Baljan.
Baljan Maratbekqyzy jas urpaqqa sapaly bilim berip qana qoımaı, olardyń tulǵa bolyp qalyptasýyna úles qosyp júr. 2024 jyldyń úzdik aýyl muǵalimi atanǵan Baljan Maratbekqyzy úshin bilim berý – jaı jumys emes, ómirdegi mıssııasy.
