«Atyraý» áleýmettik-kásipkerlik korporasııasy» AQ-nyń Aktıvterdi basqarý jáne enshiles táýeldi uıymdar departamentiniń basshysy Rýslan Qabıevtiń usynǵan aqparatyna súıensek, fabrıkanyń qurylysy 2014 jyly bastalǵan. Joba eki kezeńmen iske asyrylypty.
«Bul joba jeńil ónerkásipti damytý úshin qolǵa alyndy. Qoı jáne túıe júnin bastapqy óńdep, keıin odan daıyn ónim shyǵarý maqsaty kózdeldi. Qazir toqyma fabrıkasyna «Caspiy Lana Atyrau» JShS ıelik etedi. Atalǵan kásiporynnyń jarǵylyq kapıtalynyń 49 paıyzy «Atyraý» áleýmettik-kásipkerlik korporasııasy» AQ-ǵa tıesili», deıdi R.Qabıev.
Onyń deregine súıensek, joba quny 2 432,5 mln teńgeni quraıdy. «Atyraý» ÁKK» AQ tarapynan jobaǵa jarǵylyq kapıtal retinde 76,44 mln teńge, maqsatty zaım túrinde 1 576,1 mln teńge salynǵan. Al joba bastamashysy bolǵan ınvestor 829,5 mln teńge quıǵan.
«Jobanyń óndiristik qýaty – jylyna túıeniń 100 tonna, qoıdyń 350 tonna júnin óńdeý. Alǵashqy óńdeýden ótkizilgen júnnen 400 myń qýma metr jamylǵy shyǵarý josparlandy. Kásiporynda 2015–2017 jyldary 122 967 kılo shıkizattyq jún óńdeldi. Odan 65 289 tonna óńdelgen jún alyndy. Bul – jobada kózdelgen jyldyq qýattyń 27,4 paıyzy. Shıkizatpen qamtý jobalyq qýatynyń 10 paıyzynan aspady. Soǵan qaramastan 2016–2018 jyldary 31,658 tonna jip ıirildi. Osy jyldary 24 391 qýma metr matadan 4 591 jamylǵy shyǵaryldy. Oǵan 18 tonna jip qoldanyldy», dep málimdedi korporasııa ókili.
Alaıda 2018 jyl bastalysymen atalǵan kásiporynnyń basyna bult úıirildi. Kovıd pandemııasy órshigen 2019–2020 jyldary jumysy tipten shatqaıaqtady. Munyń saldary fabrıka óndirisiniń toqtaýyna sebep boldy.
«Fabrıkanyń jumysyn toqtatýyna birneshe sebep áser etti. Birinshiden, aınalym qarjysy bolmady. Ekinshiden, isten shyqqan keıbir tehnologııalyq qondyrǵylar men stanoktardy jóndeý máselesi sheshimin tappady. Úshinshiden, jobany iske asyrýǵa baılanysty turaqty ónim shyǵarylmady. Tórtinshiden, shıkizatty daıyndaý, naryqqa marketıngtik taldaý sekildi óndiristik úderis josparlanbady. Besinshiden, daıyn ónimdi ótkizýge baılanysty marketıngtik strategııa túzilmedi. Altynshydan, marketolog, qondyrǵy jónindegi tehnık, toqyma ónerkásibiniń tehnologi sekildi mamandardyń tapshylyǵy týyndady», deıdi R.Qabıev.
Korporasııa ókiliniń pikirine qaraǵanda, basty túıtkil shıkizattyq sapaly júnniń tapshylyǵynan týyndaǵan. Ásirese oblys aýmaǵynan tabylǵan júnniń sapasy tómen bolyp shyqqan.
«О́ıtkeni Atyraý oblysynda edilbaı tuqymdas qoı ósiriledi. Qoıdyń bul tuqymy et baǵytynda ósiriletindikten, onyń júniniń talshyǵy iri bolyp keledi. Mundaı júndi toqyma salasyna qoldaný múmkin emes. Al jińishke jáne jartylaı jińishke talshyqty jún merınos, segaı jáne krosbred tuqymdy qoıdan alynady. Qoıdyń bul tuqymdary Qazaqstanda, Reseıdiń Qalmaq jáne Daǵystan Respýblıkasynda bar», deıdi R.Qabıev.
Bul fabrıkanyń jumysy qashan jandanatynyn dóp basyp aıtý qıyn. Degenmen «Atyraý» áleýmettik-kásipkerlik korporasııasy» AQ jún fabrıkasyn qaıta jandandyrý úshin ınvestor izdep jatyr. Jobaǵa qosymsha qarjy salý qajettigi týyndap otyr.
«Investorlarǵa qoıylatyn birneshe talap bar. Birinshiden, qyzyǵýshylyq tanytqan ınvestordyń toqyma ónerkásibinde tájirıbesi bolýy qajet. Ekinshiden, shyǵarylaǵan ónimderden barynsha tabys tabatyndaı tıimdi tehnıkalyq-ekonomıkalyq model engizý kerek. Úshinshiden, kásiporyn óniminiń ózindik qunyn tómendetip, yqshamdaý jolymen shyǵyndy azaıtqany jón. Tórtinshiden, aýdandarda jáne Reseıdiń kórshiles óńirlerinde shıkizattyq jún jınaıtyn pýnktter ashý kerek. Besinshiden, ónim ótkizýge baılanysty marketıngtik baǵdarlama ázirlep, uzaqmerzimdi kelisimshart jasaýyn talap etemiz», deıdi departament dırektory.
«Caspiy Lana Atyrau» JShS-niń jún fabrıkasynda buryn 40 adam jumys istese, qazir tek dırektor ǵana qalypty. Munda basshydan ózge jumys isteıtin birde-bir adam joq.
Atyraý oblysy
