Foto: primeminister.kz
Qaýly Memleket basshysynyń 2024-2028 jyldary aýyl sharýashylyǵy óniminiń jalpy kólemin 2 esege ulǵaıtý jáne topyraqqa mıneraldy tyńaıtqyshtar engizý deńgeıin ǵylymı negizdelgen qajettiliktiń 50%-na deıin arttyrý jónindegi tapsyrmalaryn júzege asyrý sheńberinde qabyldandy.
Qujat Abaı, Aqmola, Shyǵys Qazaqstan, Jambyl, Qaraǵandy, Qostanaı, Pavlodar, Soltústik Qazaqstan, Túrkistan oblystarynyń ákimdikterine tyńaıtqyshtardyń qunyn sýbsıdııalaýǵa aǵymdaǵy nysanaly transfertter túrinde qarajat aýdarýdy kózdeıdi.
Birinshi kezekte, qarajattyń negizgi kólemi mıneraldy tyńaıtqyshtardy avanstyq sýbsıdııalaý tetigin iske asyrýǵa baǵyttalǵan.
О́tken jyldyń naýryz aıynda AО́K-ti qoldaý sheńberinde tyńaıtqyshtardy avanstyq sýbsıdııalaý tetigi engizilgeni málim. Bul rette bıýdjettik sýbsıdııalar aýyl sharýashylyǵy taýaryn óndirýshilerge arzandatylǵan tyńaıtqyshtardy jetkizý úshin otandyq zaýyttardyń arnaıy shottaryna aldyn ala aýdarylady.
Qabyldanǵan sharalar esebinen alǵash ret tyńaıtqyshtardy qoldaný deńgeıi ǵylymı negizdelgen qajettiliktiń 40%-na jetti (2024 jylǵa deıin 21%-dan aspaǵan).
Kóktemgi egis jumystaryna daıyndyq kezinde Úkimettiń der kezinde qarjylyq qoldaý kórsetýi – aýyl sharýashylyǵy taýaryn óndirýshilerdi tyńaıtqyshtarmen ýaqtyly qamtamasyz etýge jáne joǵary ári sapaly ónim alýǵa múmkindik beredi.
