Keıipkerimizdiń ózi de ustazdar áýletinen shyqqan. Ákesi Sultan Ysqaq Ońtústik Qazaqstan ólkesiniń halyq aǵartý salasynyń beldi qaıratkeri, birneshe jerde mektep saldyrǵan, Uly Otan soǵysynyń ardageri, Qazaqstannyń eńbegi sińgen muǵalimi, 45 jyl ustazdyq etken kózi ashyq jan eken. Buqar jyraýdyń sózimen aıtsaq, uly Ábdiqaıym da «negizine tartpaı qoıǵan joq».
Kommýnıstik partııanyń kezeńinde mektepte arnaıy «ólketaný buryshyn» ashty. Ol jerge Ábdiqaıym ustaz ulttyq ónegeni nasıhattaıtyn batyrdyń dýlyǵasy, saýyty, qylyshtary, er-turman ábzelderi, sáýkele, qazaq áıeliniń áshekeıleri sekildi jádigerlerdi qoıdy. Al Ulystyń uly kúnin kóktem merekesi retinde atap, oqýshylarǵa ulttyq meıramymyzdy tanystyrdy. Osylaısha qazaqy dástúrdiń qaımaǵyn buzbaı, halyqtyq merekeniń tamyryn úzbeı, aýyldan el erteńine jaýapty azamattardyń shyǵýyna yqpal ete bildi.
Iá, ǵasyrǵa jýyq ǵumyryn ǵıbratpen súrip, ǵylym-bilimmen toltyrǵan Ábdiqaıym Ysqaqtyń eńbegi búgingi urpaq úshin úlken mańyzǵa ıe. Ustaz óz isine degen sheksiz súıispenshiligi men jaýapkershiligi arqyly shákirtteriniń júregine ulttyq rýhty uıalata bildi. Sondyqtan abyz aqsaqaldyń esimi elimizdiń bilim tarıhynda altyn áriptermen jazylatyny shyndyq.
