Foto: akorda.kz
Meıirjan Iýsýpov kásiporynnyń qysqa jáne orta merzimdi jospar, maqsattaryn da atap ótti.
Prezıdentke ótken jyldyń qorytyndysy boıynsha ýran óndirisiniń kólemi 23 myń tonnadan, kompanııalar toby boıynsha satý kólemi 16,6 myń tonnadan asqany jóninde baıandaldy. Ortaq tabys 1,8 trıllıon teńgege jetken. Bul – rekordtyq meje ári 2023 jylmen salystyrǵanda 26 paıyzǵa artyq kórsetkish. Respýblıkalyq bıýdjetke aýdarylǵan salyq túsimi 720 mıllıard teńgeden asyp, ótken jylmen salystyrǵanda 58 paıyzǵa ulǵaıǵan.
Memleket basshysyna álemdik naryqtaǵy qazirgi ahýal, Qazaqstannyń tabıǵı ýran konsentratyn jetkizýge arnalǵan jańa kelisimsharttary men ınvestısııalyq jobalaryn iske asyrý boıynsha málimet berildi. О́tken jyldyń eń basty oqıǵasy retinde «Úlbi-JBQ» jaýapkershiligi shekteýli seriktestigi zaýytynyń 200 tonna tómen baıytylǵan ýran óndirip, tolyq qýatynda jumys isteı bastaǵanyn aıtýǵa bolady.
Qasym-Jomart Toqaevqa «Qazatomónerkásip» ulttyq atom kompanııasy» aksıonerlik qoǵamyn damytýdyń 2025-2034 jyldarǵa arnalǵan jańa strategııasy tanystyryldy. Onyń aıasynda kompanııa eldiń mıneraldy-shıkizat bazasyn ulǵaıtýǵa jáne ony tıimdi paıdalanýǵa den qoımaq. Byltyr resýrs qory 170 myń tonnaǵa baǵalanǵan perspektıvti aýmaqtarda ýrandy barlaý jumystaryn júrgizý úshin jańa lısenzııalar alyndy.
Meıirjan Iýsýpov Tájikstanmen sırek metaldardy óńdeý salasynda, Fransııamen atom óndirisine maman daıarlaý baǵytynda memorandýmdarǵa qol qoıylǵanyn, sondaı-aq Mońǵolııa jáne Iordanııamen atalǵan memleketterdiń aýmaqtarynda ýrandy barlaý jobalaryn birlesip zerdeleý jónindegi ýaǵdalastyqtarǵa qol jetkizilgenin aıtty.
Budan bólek, Memleket basshysyna holdıngtiń óńirlerdi damytýǵa jáne qoldaýǵa baǵyttalǵan áleýmettik mańyzy bar jobalary týraly aqparat berildi. Byltyr osyndaı bastamalardy júzege asyrýǵa 3,7 mıllıard teńgeden astam qarjy jumsalǵan.
Kezdesý sońynda Prezıdent «Qazatomónerkásip» aksıonerlik qoǵamynyń jumysyn odan ári jetildirýge jáne kompanııalar tobynyń áleýmettik mańyzy bar jobalardy oryndaýǵa qatysty birqatar mindet júktedi.
