Saraptamalyq kezdesý jetekshi ǵalymdardyń, sarapshylardyń, qoǵam jáne BAQ ókilderiniń qatysýymen ashyq pikirtalas formatynda ótti.
Kitaptyń mazmunyna keńirek toqtalǵan Erkin Tuqymov bul eńbegi elimizdiń bolashaǵy týraly úlken qoǵamdyq pikirtalastyń bastaýy bolatynyna senim bildirdi.
«Búgingi kúni biz qandaı memleket pen qoǵam quryp jatqanymyz, ol úshin qandaı reformalar qajet, qoǵamymyzdy qandaı qundylyqtar biriktiretini, ekonomıkany ártaraptandyrýdyń jáne shıkizattyq táýeldilikten arylýdyń qandaı joldary bar ekendigi týraly ashyq, shynaıy áńgime ózekti bolyp otyr. Bizde ekonomıkany, saıasatty, qoǵamdyq sanany batyl reformalaýǵa, jańǵyrtýǵa áli ýaqyt bar. Biraq ony ótkizip almaý mańyzdy, óıtkeni taǵy 20-30 jylǵa kesheýildeý óte jaǵymsyz nátıjelerge ákelýi múmkin jáne muny Azııa men Afrıkanyń kóptegen elderiniń tájirıbesi kórsetip otyr», dedi Erkin Tuqymov.
Kitaptyń birinshi bóliminde jahandyq kontekstke taldaý jasalǵan, óıtkeni Qazaqstan jahandanǵan álemniń bir bóligi bola otyryp, syrttan, sonyń ishinde ishki saıası kún tártibinde tikeleı yqpalǵa ushyraıdy.
Ekinshi bólim ekonomıkalyq múmkindikter men shekteýlerdi, atap aıtqanda, «ortasha kiris tuzaǵy» táýekelin baǵalaýǵa arnalǵan.
Úshinshi bólimde qundylyqtardyń róli men qazirgi qoǵamdaǵy ornyn qozǵaı otyryp, áleýmettik qatynastarǵa taldaý jasalady.
Sońynda, sońǵy tórtinshi bólimde avtor ótkenniń sabaqtary men bolashaqqa arnalǵan kún tártibin eskere otyryp, Qazaqstannyń damý múmkindikteriniń «tar dálizi» týraly óz kózqarasymen bólisken.
Kitapta bılikti ortalyqsyzdandyrý, jergilikti ózin-ózi basqarýdy damytý jáne qoǵamnyń reformalarǵa daıyndyǵy máseleleri de qozǵalady.
Tusaýkeserde sóz sóılegen Qoldanbaly etnosaıası zertteýler ınstıtýtynyń dırektory Talǵat Qalıev memlekettik basqarý júıesinde, ult qurylysynda, bolashaqtyń beınesin qalyptastyrýda josparlaý kókjıegin keńeıtý qajettigin atap ótti.
Al QSZI bas ǵylymı qyzmetkeri, áleýmettaný ǵylymdarynyń doktory Aıgúl Zabırova usynylyp otyrǵan monografııa jahandyq syn-qaterlerdi taldaýdyń, saıası ekonomıkalyq taldaýdyń, tarıhı túsinik pen otandyq qoǵamnyń mádenı portretiniń nanymdy úılesimin usynatyn Qazaqstandy zertteý ekenin atap ótti.
Kezdesýde sondaı-aq «Ádil sóz» sóz bostandyǵyn qorǵaý halyqaralyq qorynyń jetekshisi Qarlyǵash Jamanqulova, «Qoǵamdyq pikir» zertteý ınstıtýtynyń dırektory Botagóz Raqysheva, «Amanat» partııasy Qoǵamdyq saıasat ınstıtýtynyń dırektory Mádına Nurǵalıeva, «Jastar» ǵylymı-zertteý ortalyǵynyń dırektory Oljas Beısenbaev, QSZI bas ǵylymı qyzmetkeri, saıası ǵylymdarynyń doktory Sanat Kúshkimbaev sóz sóılep, atalǵan monografııadan árkim óz nazaryn aýdaratyn nárse taba alatynyna senim bildirdi, óıtkeni onda syrtqy saıasat, ulttyq biregeılik, memleket pen qoǵamdy jańǵyrtý máseleleriniń aýqymy qozǵalady.
Saraptamalyq kezdesý sońynda avtor pikirtalasqa qatysýshylarǵa alǵysyn bildirip, aıtylǵan usynystar men eskertpeler aldaǵy zertteýler men praktıkalyq usynystarǵa negiz bola alatynyna senim bildirdi.
