Foto: Qyrmyzy Jumaǵalıqyzy
Búgin, jańarý men jaqsylyqtyń belgisi bolǵan Naýryz meıramyna oraı, Túrkistannyń «Kerýen saraı» kesheninde úlken merekelik shara uıymdastyrylyp, qala turǵyndary men qonaqtaryna keremet kóńil-kúı syılady. Ulttyq dástúrimizdi dáripteıtin, ata-babamyzdyń asyl murasyn jańǵyrtatyn bul meıram birlik pen tatýlyqtyń sımvolyna aınaldy desek te bolady.
Merekelik sharanyń ashylý saltanatynda oblys ákimi Nuralhan Kósherov jınalǵan jurtshylyqty Naýryz meıramymen quttyqtap, bul kúnniń halqymyz úshin qanshalyqty mańyzdy ekenin atap ótti.
«Ulystyń uly kúni halqymyzǵa qut-bereke, molshylyq ákelsin! Táýelsizdigimiz tuǵyrly, yrysymyz uzaǵynan bolsyn!», dedi aımaq basshysy.
Naýryz meıramy – tek tabıǵattyń jańarýymen ǵana emes, adamnyń rýhanı jańǵyrýymen de astasatyn erekshe kún. Bul kúni renjisken jandar tatýlasyp, baýyrmaldyq pen dostyq artady. Osy dástúrdi ulyqtaǵan shara barysynda jınalǵan kópshilik bir-birine aq jarma tilekterin jaýdyryp, merekeniń sánin keltirdi.
Kúnniń shýaǵyndaı jylylyq pen qýanyshqa toly bul mereke ulttyq oıyndarmen, ásem án men kórkem bımen aıshyqtaldy. Alańǵa tigilgen kıiz úıler qazaq halqynyń turmys-saltyn aıshyqtap, ár úıdiń tórinde qazaqtyń qasıetti dastarqany jaıyldy. Qonaqtar naýryz kóje men basqa da ulttyq taǵamdardan dám tatyp, aq jaýlyqty analardan bata aldy.
Merekelik shara aıasynda qazaqtyń baı mádenıetin tanytatyn túrli baǵdarlamalar uıymdastyryldy. Sonymen qatar alańdaǵy jınalǵan jurt dombyra únine qosylyp, halyq ánderin shyrqap, qazaq halqynyń ulttyq bolmysyn aıqyndaıtyn salt-dástúr kórinisterin tamashalady.
Merekeniń basty nyshany – naýryz kóje kópshilikke usynylyp, merekege jınalǵandar yrys pen molshylyqtyń dámin tatty. Dastarqan basynda aqsaqaldar men el aǵalary bata berip, halqymyzdyń «Yrys aldy – yntymaq» degen sózin taǵy bir dáleldegendeı boldy.
Qazaq halqy úshin Naýryz – tek kóktem merekesi ǵana emes, birlik pen meıirimniń, dostyq pen izgiliktiń sımvoly. Búgingi shara da osy qundylyqtardy dáriptep, kópshiliktiń júregine jylýlyq uıalatty.
