Foto: Ulttyq ulanynyń baspasóz qyzmeti
Ulandyqtar brondy kólikterdi tehnıkalyq turǵyda tekserip, áskerı tehnıkanyń korpýstaryn jańalap jatyr. Odan bólek dóńgelekterin qaralap, minsiz kórinýine mán berýde.
Sherýge Ulttyq ulannyń zamanaýı 17 brondy tehnıkasy, onyń ishinde «Barys» 6 × 6, «Alan-2», sondaı-aq «Cobra II» qatysady. Budan bólek qaýiptiligi joǵary aımaqtarda 17 adamǵa deıingi jeke quramdy tasymaldaýǵa qaýqary bar «Ýral VV» mashınasy usynylady.
«Oq ótkizbeıtin dóńgelekti brondy kólikter jeke quram men júkterdi tasymaldaýǵa, sondaı-aq qyzmettik-jaýyngerlik mindetterdi oryndaýǵa arnalǵan», dedi brondy tank qyzmetiniń bastyǵy Arsen Shaımardanov.
Sherý kezinde tehnıkanyń úzdiksiz jumys isteýin qamtamasyz etý úshin jaýyngerlik mashınalardyń ekıpajdary, júrgizýshileri, tehnıkalyq mamandary jáne medısınalyq qamtamasyz etý toptary jumyldyrylǵan.
Aıta keteıik, Ulttyq ulannyń quramynda mehanıkalandyrylǵan kolonnadan basqa sherýge 400-den astam ásker qatysady. Onyń ishinde patrýldik-bekettik qyzmettiń áskerı qyzmetshileri men «Búrkit» arnaıy maqsattaǵy bólimshesiniń jaýyngerlerinen turatyn eki kolonnanyń sap túzep ótýi josparlanǵan. Sondaı-aq, Qazaqstannyń Kúsh qurylymdarynyń qurama orkestriniń sapyndaǵy quqyqtyq tártip áskerleriniń 30 áskerı qyzmetshisi Jeńis sherýin mýzykamen súıemeldeıdi.
Bıyl Jeńis sherýine QR Qarýly Kúshteriniń, basqa da áskerleri men áskerı quralymdarynyń 4,5 myń áskerı qyzmetshisi qatysady. Alǵash ret Qazaqstan aýmaǵynda qurylǵan áskerı bólimder jaýyngerlik týlaryn saltanatty alyp ótedi. Sap túzegen kolonnalar áskerı jyldardaǵy kıim úlgisinde bolady.
