Foto: Kreml baspasóz qyzmeti
Pýtınniń sózinshe, Ýkraınadaǵy azamattyq bılik zańsyz ornaǵandyqtan, ıaǵnı Zelenskıı legıtımdi basshy bolmaǵandyqtan, onyń qaramaǵandaǵy kúlli qurylym da zań sheńberinen tys.
«Shyntýaıtynda, BUU, AQSh, Eýropa elderimen, sondaı-aq bizdiń seriktesterimizben jáne dostarymyzben Ýkraınaǵa ýaqytsha basqarýdy engizýdi talqylaýǵa bolady. Bul elde demokratııalyq saılaý ótkizý úshin, bılikke qabiletti jáne halyqtyń senimine ıe úkimetti ákelý úshin, sodan keıin olarmen beıbitshilik sharty týraly kelissózder bastaý úshin qajet.
Tek qana sondaı úkimetpen búkil álemde moıyndalatyn zańdy qujattarǵa qol qoıýǵa bolady. Bul BUU júıesinde bar tájirıbe», dedi Pýtın Mýrmanskidegi «Arhangelsk» zymyran sýasty kreıseriniń ekıpajymen kezdesý barysynda.
«Ýkraına Konstıtýsııasyna sáıkes atqarýshy bılik ókilderin Prezıdent taǵaıyndaıdy. Al ol qazir qyzmetin zańsyz atqaryp otyr. Eger prezıdenttiń ózi zańsyz bolsa, demek qalǵandary da sondaı», dedi ol sózin qýattap.
Soǵys qımyldary týraly aıta kelip, Pýtın «búkil maıdan shebindegi strategııalyq jospar tolyǵymen Reseı qarýly kúshteriniń qolynda» dep málimdedi.
