Foto:Aqorda
Memleket basshysy sloven delegasııasyna qurmet kórsetip, Qazaqstannyń Eýropadaǵy ýaqyt synynan ótken senimdi seriktesi Slovenııamen ózara tıimdi yntymaqtastyqty damytýǵa beıil ekenin rastady.
«Sizdiń bul saparyńyz eki el arasyndaǵy ózara yntymaqtastyqqa tyń serpin berý turǵysynan óte mańyzdy. Jańa ǵana kóptegen taqyrypty, onyń ishinde halyqaralyq ahýalǵa baılanysty keıbir názik máselelerdi talqylaǵan asa mazmundy kezdesý ótkizdik. Biz ekijaqty yqpaldastyqty damytýǵa nıetti ekenimizdi qýattadyq. Naqty nátıjelerge qol jetkizý úshin bar kúsh-jigerimizdi jumsaımyz», dedi Qazaqstan Prezıdenti.
Qasym-Jomart Toqaev ekijaqty qarym-qatynastarǵa tyń serpin beretin baǵyttardy atap ótip, Qazaqstanda Slovenııa bıznesine qolaıly jaǵdaı jasaýǵa nıetti ekenin jetkizdi. Bul úshin kásipkerlik qyzmetti retteýdiń ashyqtyǵyn qamtamasyz etý, ınvestısııany qorǵaý men ekonomıkany ártaraptandyrý kózdelip otyr.
Memleket basshysy Astanada ótetin Qazaqstan-Slovenııa bıznes-forýmyna erekshe mán beretinin jetkizip, atalǵan jıyn eki eldiń saýda-ınvestısııalyq baılanysyn odan ári keńeıtetinine toqtaldy.
Natasha Pırs-Mýsar Astanada qonaqjaılyq kórsetkeni úshin Qasym-Jomart Toqaevqa alǵys aıtty
«Bul sapar ekonomıkalyq yntymaqtastyǵymyzdy tereńdetýge septigin tıgizedi dep oılaımyn. Atalǵan maqsatty eki el de qoldaıdy. Budan da joǵary jetistikterge jetetinimizge senimdimin. Oǵan bizdiń mol múmkindigimiz bar. Elderimiz arasyndaǵy taýar aınalymy jyl saıyn artyp keledi. О́zińiz aıtqandaı, Slovenııanyń Qazaqstan ekonomıkasyna salǵan ınvestısııasynyń kólemi 200 mıllıon dollarǵa jetti. Biraq áleýetimiz budan da zor. Osy sebepti Astanaǵa menimen birge Slovenııanyń jetekshi 25 kompanııasynan quralǵan úlken bıznes-delegasııa keldi. Men buǵan qýanyshtymyn», dedi Slovenııa Prezıdenti.
Taraptar saýda, ınvestısııa, kólik-logıstıka, mańyzdy mıneraldar, sıfrlandyrý, jasandy ıntellekt, densaýlyq saqtaý jáne týrızm sııaqty perspektıvti salalardaǵy yqpaldastyqtyń birqatar máselesin qarastyrdy.
