Foto: Bas prokýratýra
«Elimiz boıynsha júzdegen aýyldar óz erkimen spırtti ishimdikterdi satýdan bas tartýda. Bul — qarapaıym halyqtyń sanaly tańdaýy. Tártip, densaýlyq jáne balalarynyń bolashaǵy úshin jasalǵan sheshim. Máselen, Mańǵystaý oblysynyń Mańǵystaý aýdanyndaǵy bir aýylda turǵyndar ishimdikti satýdan óz erkimen bas tartyp, bul týraly beınerolıkti áleýmettik jelilerde jarııalady», dep jazdy Bas prokýror.
Onyń aıtýynsha, Mańǵystaý, Aqmola, Jambyl, Qaraǵandy, Atyraý oblystaryndaǵy birneshe aýyl turǵyndary dúkenderden ishimdikti satýdy toqtatqan.
«Iá, bul eldegi barlyq aýyl sanyn eskersek, teńizge tamǵan tamshydaı kórinýi múmkin. Biraq bastysy — jaǵdaıdyń oń serpini bar. Mundaı eldi mekender sany artyp keledi. Adamdar senim men turaqtylyqty, tynyshtyqty joǵary baǵalap, bir-birine úlgi bola bastady. Bastama aýyl aqsaqaldary men Qoǵamdyq keńesterden shyǵyp, prokýratýra, polısııa jáne jergilikti ákimdikterdiń tarapynan úılestirý, aldyn alý jáne qaýipsizdik qamtamasyz etildi», dedi Berik Asylov.
Bul rette Berik Asylov aýyl kásipkerleriniń erekshe alǵysqa laıyq ekendigin atap ótti. Sebebi, olar jerlesteriniń únin estip, dúken sórelerinen ishimdikti óz erkimen alyp tastaǵan.
«Kúmándanǵanmen, tabystary azaıǵan joq. Kerisinshe, aýyl turǵyndary ishimdiktiń ornyna balalarǵa paıdaly azyq-túlikterdi jıi satyp ala bastady. Nátıjeler ózdiginen kórinip tur. Atap aıtsaq, keıbir aýyldarda qylmys múlde joıylyp, turmystyq janjaldar toqtady jáne jastar sport pen sanaly ómir saltyn tańdaı bastady», dedi B. Asylov.
Sonymen qatar, Bas prokýror tártiptiń qorqynysh arqyly emes, senim men sanaly tańdaý arqyly ornaıtynyn basa aıtty.
«Bul — «Zań jáne Tártip» qaǵıdatynyń ómirdegi naqty kórinisi. Tártip qorqynyshpen emes — senimmen, jaza arqyly emes — sanaly tańdaýmen ornaıdy. «Zań men Tártip — kemel demokratııanyń irgetasy ári quqyqtyq memlekettiń negizi», – dep Memleket basshysy atap ótken edi. Biz bolashaqqa degen qamqorlyq, qoǵamdyq kelisim jáne zańǵa qurmetke negizdelgen árbir bastamany qoldaımyz», dep túıindedi Bas prokýror.
Aıta keteıik, resmı statıstıka boıynsha bıylǵy jyldyń alǵashqy úsh aıynda alkogoldik mas kúıinde jasalǵan qylmystar sany azaıǵan.
