Osy jobaǵa oraı Almaty óńirlik kommýnıkasııalar qyzmetiniń baspasóz konferensııasynda qalalyq mansap ortalyǵynyń jumys berýshilermen jáne áriptestermen jumys bóliminiń basshysy Aqarys Tórebekov: «Qazaqstan halqynyń 27%-yn jastar quraıdy – bul 5,3 mıllıon adam. Jyl saıyn eńbek naryǵyna 250 myńǵa jýyq jas maman shyǵady, alaıda olardyń barlyǵy birden óz mamandyǵy boıynsha jumys taba bermeıdi. Biz bul jaǵdaıdy ózgertkimiz keledi», dedi.
Mamannyń aıtýynsha, alǵashqy bos oryndar jármeńkesi 31 naýryzda Almaly aýdanynda, Almaty tehnologııalyq ýnıversıtetiniń bazasynda ótip, oǵan 50-den astam jumys berýshi men 500-den asa jumys izdeýshi qatysqan.
«Biz jastarǵa jumys tabýmen qatar, óz daǵdylaryn damytýǵa, naryq talaptaryn túsinýge jáne motıvasııa alýǵa múmkindik beretin biryńǵaı alań quryp jatyrmyz», deıdi Aqarys Tórebekov.
Ol jaqyn arada joba qalanyń barlyq aýdandaryn qamtıtynyn aıtty. 14 sáýirde bos oryndar jármeńkesi Medeý aýdanynda Qazaq Ulttyq Agrarlyq Zertteý Ýnıversıtetiniń bazasynda, al 24 sáýirde Bostandyq aýdanynda Satbayev University bazasynda ótedi. Kóktemniń sońyna deıin taǵy bes, al kúzde úsh is-shara ótedi.
Uıymdastyrýshylar 8 myńnan astam jastardy qamtýdy jáne keminde 500 adamdy jumysqa ornalastyrýǵa járdemdesýdi josparlap otyr. Jármeńkelerden basqa, kásiporyndarǵa ekskýrsııalar jáne BAQ pen áleýmettik jelilerde belsendi aqparattyq qoldaý qarastyrylǵan.
«Jalpyqalalyq mansap kúnderi» jobasy jastar arasyndaǵy jumyssyzdyqty tómendetýdegi mańyzdy qadam ári almatylyq jastar arasynda kásibı damýǵa turaqty yntalandyrýdy qalyptastyrýǵa kómektesedi», dep qorytyndylady sózin spıker.
