Bul jetistik – Qazaqstandaǵy qazaq tilinde bilim beretin mektepterdiń halyqaralyq standarttarǵa sáıkestigin rastaıtyn mańyzdy qadam. 1968 jyly Jenevada negizi qalanǵan bul baǵdarlama qazirgi tańda 150-den astam eldegi 5 myńnan asa mektepte engizilgen.
Aıta keteıik, IB – bul jaı ǵana akademııalyq baǵdarlama emes. Ol oqýshylardy bilim alýǵa, álemdegi jáne elimizdegi aýqymdy máselelerdi anyqtap, olardy sheshýge úıretedi. IB baǵdarlamasy arqyly 3 jastan 19 jasqa deıingi oqýshylar bilimderin halyqaralyq deńgeıde kórsete alady. Mektepte oqýshylar tek sapaly bilim alyp qana qoımaı, sonymen qatar óz betinshe taldaý jasaıtyn, kreatıvti oılaıtyn jáne kópultty ári kópmádenıetti ortada tıimdi qarym-qatynas jasaı alatyn kóshbasshy, jobalyq menedjer retinde qalyptasady.
IB baǵdarlamasy 162 elde 5800 mektepte oqytylady. Onyń maqsaty – zııatkerlik ári jahandyq kóshbasshylardy daıarlaý, olardy qazirgi zamannyń qarqyndy ózgeristerine beıimdelýge úıretý.
«IB baǵdarlamasy muǵalimderdiń kásibı deńgeıin arttyrýǵa úlken serpin beredi. Pedagogter únemi tájirıbe almasyp, kásibı turǵydan damýǵa yntalandyrylady. Oqýshylar úshin bul baǵdarlama – teńdesi joq múmkindik, sebebi IB dıplomy álemniń úzdik ýnıversıtetterinde bilim alýǵa jol ashady. ZAMAN mektebinde IB baǵdarlamasy qazaqstandyq jáne halyqaralyq bilim berý ádistemelerin biriktirip, jan-jaqty oqytýdy qamtamasyz etedi. Sabaqtar qazaq jáne aǵylshyn tilderinde júrgiziledi, bul oqýshylarǵa jahandyq bilim keńistiginde básekege qabiletti bolýǵa kómektesedi. Mektepte IB baǵdarlamasy boıynsha oqytý tájirıbesi bar joǵary bilikti muǵalimder jumys isteıdi», dep atap ótti mekteptiń negizin qalaýshy Gaýhar Nýrova.
2025 jyldyń qańtar aıynda mektep Middle Years Programme (MYP) baǵdarlamasy boıynsha avtorızasııa alǵan, al sáýir-mamyr aılarynda joǵary deńgeıdegi Diploma Programme (DP) baǵdarlamasynyń avtorızasııasyn alýǵa nıetti. IB baǵdarlamasynyń barlyq deńgeılerin alý – mekteptiń damýy men otandyq bilim berý sapasyn arttyrý jolyndaǵy mańyzdy qadamdardyń biri bolmaq.
Qazaqstanda IB baǵdarlamasymen oqytatyn mektepterdiń sany áli de az, al ZAMAN mektebi – halyqaralyq standarttardy engizip, oqýshylaryna jańa múmkindikter ashqan alǵashqy bilim ordalarynyń biri. Mekteptiń halyqaralyq jetistikteri – qazaq tilinde bilim beretin mektepterdiń zamanaýı bilim berý júıesine beıimdelýiniń jáne jahandyq bilim berý qaýymdastyǵyna ıntegrasııalanýynyń aıqyn dáleli.
