О́tken senbi kúni oblys ortalyǵyn qoqystan jappaı tazalaý jumysy bastalyp ta ketti. Qalanyń 10-shaǵyn aýdany, et kombınaty bóligi, Derkól men Zachagan kentin baılanystyratyn aınalma jol, Jelaev joly boıy tazalandy. Is-sharalarǵa bir myńnan astam adam, stýdentter, jastar, memlekettik qyzmetshiler, úkimettik emes uıymdar atsalysty. Bilim berý uıymdary, densaýlyq saqtaý mekemeleri, bıznes nysandary, kásiporyndar, kópqabatty, jeke sektordaǵy turǵyn úı ıeleri ózderine qarasty aýmaqty jınady. Senbilik aıasynda qala aýmaǵynda bir kúnde 400 tonna qoqys qaldyǵy shyǵaryldy.
– Biz qala tazalyǵyn uıymdastyrýdy birneshe baǵytqa bólip qolǵa aldyq. Qazir ákimdiktiń bólim mamandary qalanyń ár ýchaskesindegi bıznes nysandardy aralap, óz aýmaǵyn tazalaý jóninde resmı habarlama taratyp jatyr. Sanıtarlyq tazalyq aılyq aıasynda jasaıtyn jumys kólemi naqty josparlanǵan, – deıdi Oral qalasy ákiminiń orynbasary Jandos Dúısenǵalıev.
Osy josparǵa sáıkes, aldaǵy 5, 26 sáýirde ótetin senbilikter – kóshet otyrǵyzý, tal-terektiń túbin ákteý, gúlzarlardy qalpyna keltirý aptalyǵy bolmaq. Oral qalasynda 57 skver men saıabaq bar. Olardyń árqaısysyna oblys ortalyǵyndaǵy departamentter men basqarmalar jaýapty bolyp bekitilgen. Ár basqarma ózine qarasty aýmaqty abattandyrýǵa ázir.
Jandos Ashatulynyń aıtýynsha, 19 sáýirde «taza jaǵalaý» is-sharasy ótedi. Oral qalasyn orap jatqan Derkól, Shaǵan, Jaıyq ózenderiniń jaǵalaýy tazalanady. Bul sharaǵa da túrli mekeme, uıym qyzmetkerleri jumyldyrylady.
Bir aıta keterligi, sanıtarlyq-ekologııalyq aılyq ýaqytynda senbi kúnderi Oral-Saratov tas joly boıyndaǵy, Asan aýylynyń mańyndaǵy polıgondar turǵyndardan kúl-qoqysty tegin qabyldaıtyn boldy. Iаǵnı jeke aýlasy bar turǵyndar qys boıy jınalyp qalǵan kóń-qoqysyn arnaıy oryndarǵa tegin tógip kete alady.
Búginde Oral qalasynyń tazalyǵyn kútip-ustaý tender nátıjesinde «Jaıyq taza qala» mekemesine tapsyrylǵan. Kompanııa 2026 jyldyń sońyna deıin qyzmet kórsetpek. Sonymen qatar iri gabarıtti qaldyqtardy shyǵarýǵa «Stroı Kompas» JShS da atsalysady.
«Qala ákimdigi qala aýmaǵynda konteıner alańdaryn salyp, jańa eýrokonteınerler satyp alý jumysyn jalǵastyryp keledi. Bıyl jergilikti bıýdjet qarajaty esebinen 1 000 dana eýrokonteıner alynyp, qatty turmystyq qaldyqtarǵa arnalǵan 80-ge jýyq jańa alań jasalatyn bolady», deıdi J.Dúısenǵalıev.
Oral qalasynda abattandyrý erejesin saqtaý, buzýshylyqqa jol bermeý maqsatynda qalalyq turǵyn úı kommýnaldyq sharýashylyq bólimine qarasty monıtorıngtik top qurylǵan. Top quramyndaǵy 15 adam qala aýmaǵynda kúndelikti monıtorıng júrgizip otyrady. Toptyń jumysy óte nátıjeli, 2025 jyldyń basynan beri ǵana ereje buzýshylyqty joıý jóninde 1 188 habarlama berilgen.
Qorshaǵan ortany kútip ustaý, tazalyq saqtaý – árkimniń mindeti. Sondyqtan mekeme, uıymdar, ásirese bıznes nysandary, kommersııalyq uıymdar, qurylys mekemeleri ózderine tıesili aýmaqty retke keltirip, kúl-qoqystan tazalaý, abattandyrý isine belsendi qatysýǵa tıis. Sondaı-aq PIK, MIB, JS sııaqty kóppáterli úılerdi basqarýshy nysandar da tazalyq aılyǵyna bir kisideı qatysyp, turǵyndar óz aýlasynda, kópqabatty úılerde senbilik uıymdastyryp jatyr.
Batys Qazaqstan oblysy
