2015 jyly ataýyn ózgertken óndiris ornynda túrli salaǵa mamandanǵan birneshe jaýapkershiligi shekteýli seriktestik paıda boldy. Bertin kele birneshe óndiris orny men zaýyttyń basyn qosqan kompanııalar tobyna aınaldy. Qazir «BENT»-qa qarasty kásiporyndar birneshe úlgidegi temir-beton shpaldardy, óndiristik qýaty jylyna 800 myń danadan astam rels bekitkishin shyǵarady. 2016 jyldan bastap jumys isteıtin «QapshaǵaıHımMontaj» JShS qıyrshyq tas pen shoıtas óndiredi. «Avtoklav KZ» JShS avtoklavty gaz bloktaryn shyǵarýmen aınalysady. О́ndiristik qýaty – jylyna 150 myń tekshe metrden astam gaz blogi.
Kompanııa basshysy Dinmuhamed Kýzıevtiń aıtýynsha, zaýyt ónimi – qabyrǵalardy, qalqalardy, qasbetterdi jylytý sııaqty ártúrli qurylys úshin taptyrmas qural.
«Avtoklavty gaz bloktaryn óndirý kezinde joǵary sapaly materıaldardy ǵana paıdalanamyz. Olarda sapa sertıfıkatynyń bar-joǵy tekseriledi jáne mindetti túrde zerthananyń kiris baqylaýynan ótedi. Tehnologııalyq úderis tolyǵymen avtomattandyrylǵan jáne kompıýterlendirilgen, bul adam faktoryn is júzinde boldyrmaýǵa múmkindik beredi. Kásiporynǵa salynǵan ınvestısııa 2 mlrd teńgeni quraıdy, sondaı-aq 150 jumys orny quryldy», deıdi D. Kýzıev.
2023 jyly qurylǵan «Fasteners Metal» BK» JShS – Almaty oblysynda ashylǵan eń alǵashqy Qazaqstan-Qytaı birlesken kásiporyny. Atalǵan kásiporynda óndiriletin relstik bekitpeler otandyq temirjol men metroda qoldanylady. Sondaı-aq Qyrǵyzstan, Reseı, О́zbekstan, basqa da elderge eksporttalady. Bul óndiristi iske qosý «Qazaqstan temir joly» ulttyq kompanııasynyń bas merdigerlerine relstik bekitpesi bar jıyntyqta daıyn temirbeton shpaldardy satyp alýǵa múmkindik berdi. Buryn bul shpaldardyń burandalaryn bólek satyp alatyndyqtan, qosymsha shyǵyndar týyndaıtyn. Endi burandasy bar shpaldardy jetkizýdiń nátıjesinde «QTJ» shyǵyny da aıtarlyqtaı tómendedi.
Qazir «Fasteners Metal» kompanııasy 800 myńnan astam shpal men 1 mln 200 myńǵa jýyq relsti bekitkish shyǵarady. О́ndiristik qýaty – jylyna 1 500 000 jol burandasy men 2 000 000 serpimdi termınal. Elimizdegi biregeı óndiris oshaǵy bolyp sanalatyn kásiporyn jumysy tolyqtaı avtomattandyrylǵan.
Keıipkerimizdiń aıtýynsha, 2021 jyly reseılik áriptestermen birlese otyryp, «StandLab» JShS – táýelsiz akkredıttelgen zerthana ashýǵa sheshim qabyldandy. Naryq sapaly taýarlardyń qajettigin endi ǵana sezine bastaǵan. Zerthana Almaty qalasy men Almaty oblysynda qurylys jáne temirjol materıaldarynyń 400-den astam túrin synaqtan ótkizedi. Zerthana ashý nátıjesinde 80 adam jumyspen qamtyldy.
«2020 jyldyń aldyndaǵy ahýal «kúrishtiń arqasynda kúrmek sý ishedini» eske túsirdi. Syrttan kóleńkeli jolmen keletin, eshbir standartqa saı emes qurylys materıaldary naryqtyń otandyq ónimderge degen senimine selkeý túsirdi. Akkredıttelgen zerthana ashý qajet degen sheshimge sol kezde bekindik. Bizdiń kompanııalar tobyna qarasty kásiporyndarynda shyǵarylǵan taýarǵa qoldanatyn shıkizat quramy aldymen sol zerthanada tekserýden ótedi. Sodan keıin naryqqa jol tartady. Osy oraıda aıta keter taǵy bir jaıt – jumyspen qamtý máselesi. Biz kóp jyl boıy jumysshy tapshylyǵyn bastan ótkerdik. Kópir krandary mashınıst, gaz-elektrmen dánekerleýshi, qalyptaýshy, zerthanashy, beton-aralastyrý toraptarynyń operatorlary qajet. О́kinishke qaraı, mundaı mamandar Almaty oblysynda daıarlanbaıdy. Zaýyt janynan ashylǵan akkredıttelgen oqý ortalyǵynda 300 adamdy oqytý josparlanǵan bolatyn. Kýrsty bitirgennen keıin «BENT» fırmasynyń zaýytynda jumys isteýge mindettegen joqpyz. Olar ózderi qalaǵan jerge jumysqa ornalasýǵa erikti. Biraq túlekterimizdiń kóbi bizge qarasty zaýyttarda qalýǵa sheshim qabyldady», deıdi D.Kýzıev.
Onyń sózinshe, naryqtyń qazirgi betalysy táp-táýir. Salada serpilis baıqalady.
«Prezıdent 2025 jyldy «Jumysshy mamandyqtary jyly» dep jarııalady. Atalarymyz, ákelerimiz 1960 jyldary tehnıkalyq mamandyqtardyń bási basym bolǵanyn jıi aıtady. Qazir de tehnıkalyq mamandyqtarǵa suranys joǵary. Ekonomıka sıfrlanyp, avtomattandyrý deńgeıi jańa mamandyqtarǵa suranysty arttyryp jatyr. Irgeli tarıhy bar zaýyttar jastarǵa belgili bir salaǵa mamandanýǵa múmkindik beredi. Qazir «BENT» ónerkásiptik kompanııalar toby qyzmetkerleriniń 54%-y – tehnıkalyq mamandyqty ıgergen 36 jasqa deıingi jas mamandar», deıdi D.Kýzıev.
ALMATY
