Bul mádenı ortalyq 1980 jyldan bastap halyqqa qyzmet kórsete bastaǵan. Alaıda sońǵy jyldary ǵımarat qaraýsyz qalyp, 2023 jyly kommýnaldyq mekeme óz menshigine alady. Sarapshylar zertteý júrgize kele nysandy buzý qajettigin anyqtady. Osyǵan baılanysty Shymkent qalasy ákimdigi «Sábı» qorynyń qoldaýymen saraıdy buzyp, ornyna jańa mádenıet saraıyn salý týraly sheshim qabyldady.
Qala ákimi qatysýshylardy mańyzy zor qurylystyń bastalýymen quttyqtap, «Fosforshylar mádenıet saraıy» uzaq ýaqyt boıy qalanyń mádenı ortalyǵy bolǵanyn atap ótti. Mamandar tarapynan júrgizilgen zertteý jumystary negizinde qurylysty qaıta jańǵyrtýǵa sheshim qabyldanyp, bul bastamaǵa «Sábı» qorynyń negizin qalaýshylar qoldaý kórsetti.
– Shymkenttiń baı tarıhy men biregeı mádenı murasy bar. Qalada ekonomıkalyq ósimge, ınfraqurylymdy damytýǵa jáne turǵyndardyń ómir súrý sapasyn jaqsartýǵa erekshe nazar aýdarylyp, megapolıs jalpy barlyq baǵyttar boıynsha qarqyndy damyp keledi. Bul nysannyń qurylysy bolashaqqa jasalǵan mańyzdy ınvestısııa bolmaq. Jańa mádenıet saraıy qalanyń damýyna serpin beretin jańa mádenı ortalyqqa aınalady, – dedi Ǵ.Syzdyqbekov.
Jańa mádenıet saraıy birneshe baǵytty qamtıtyn kóp salaly ortalyq bolmaq. Munda IT-hab, kreatıvti hab jáne qoǵamdyq bastamalar haby jumys isteıdi. Qala turǵyndary úshin kreatıvti ındýstrııa alańdary, sýretshiler sheberhanasy, kórme zaly, amfıteatr, kovorkıng, keńse bólmeleri, forým alańy, sán kórsetilimine arnalǵan transformer-sahna, bıznes-ınkýbator, foto jáne vıdeostýdııa, dybys jazý stýdııasy, podkast alańy, konferens-zal, sondaı-aq, ekologııalyq bastamalar men ata-analar klýbtary sekildi qalalyq qaýymdastyqtardyń fılıaldary qoljetimdi bolady. Sondaı-aq, bolashaqqa qajetti daǵdylardy damytýǵa erekshe kóńil bólinedi. Atap aıtqanda, IT-modeldeý jáne robototehnıka, turmystyq sharýashylyq, rýnıkalyq jazý, dombyra tartý, shahmat, basseın, úlken tennıs, fýtbol, kúres, kórkem gımnastıka, jattyǵý zaly men bı sabaqtary uıymdastyrylady.
«Sábı» qorynyń tapsyrysy boıynsha jańa mádenıet saraıynyń dızaıny ázirlendi. JobadaShymkentke tán tarıhı jáne zamanaýı elementter úılestiriledi. Jańǵyrtý josparyna sáıkes, nysan mańyndaǵy aýmaq ta keshendi túrde abattandyrylady. Munda saıabaq alańdary, alleıalar, sýburqaqtar jáne zamanaýı balalar alańdary salynyp, qala turǵyndary men qonaqtary úshin jaıly keńistik jasalady.
