Esim-soıy ult óneriniń bıiginde máńgi qalǵan tulǵa shyǵarmashylyǵyna arnalǵan is-shara jambyldyq ónersúıer qaýymdy beıjaı qaldyrǵan joq. Maestro ónerine bas ıgen jurt úlken zaldy lyq toltyrdy. Kompozıtordyń lırıkalyq ánderin qosyla shyrqaǵandardyń ishinde kózine jas alǵandardy da baıqadyq.
Konsert shymyldyǵy kúıshi-kompozıtordyń áıgili «Ata tolǵaýy» kúıimen túrildi. Dýlat Baızildaev jetekshilik etetin qazaq ult-aspaptar orkestri oryndaǵan týyndy kópshiliktiń júregine jetkeni anyq. Tumanbaı Moldaǵalıev sózin jazǵan áıgili «Qustar áni», «Júregim meniń» ánderi de zalǵa jınalǵan jurtty tolqytty.
Ádemi ándermen ádiptelgen keshte qońyr úndi Janatbek Qadirov, Mádenıet salasynyń úzdikteri Ońal Azamatova, Mádına Saǵynbekova, Aıgúl Maqasheva bastaǵan ózge de esimi óńirge belgili ánshiler Nurǵısa Tilendıevtiń el súıip tyńdaıtyn ǵajap ánderin naqyshyna keltire shyrqady.
Bul kúni Nurǵısa Tilendıevtiń, «Kýá bol», «Balamıshka», «Sarjaılaý», «О́z elim» sekildi ózge de birqatar shyǵarmalary oryndaldy. Kesh sońy orkestrdiń súıemeldeýindegi «Mahambet» poemasymen túıindeldi.
О́nersúıer qaýym úshin Nurǵısa shyǵarma-lary eshqashan ólmeıtini daýsyz. Tulǵa týyndylary nasıhattalǵan keshte de muny anyq ańǵardyq. Fılarmonııa ujymy uıymdastyrǵan konserttiń joǵary deńgeıde ótýine «Aqkerbez», «Boztorǵaı» sekildi bı ansamblderi de aıtarlyqtaı úles qosty.
Taraz
