Parlamentaralyq Odaqtyń mereıtoılyq jıyny­

Májilis spıkeri baıandamasynda atap ótkendeı, forýmnyń ǵasyrlar boıy halyqtar men mádenıetterdi toǵystyrǵan Uly Jibek jolynyń bo­ıynda uıymdastyrylýynyń rámizdik máni zor. Ol Parlamentaralyq Odaq­tyń 150-Assambleıasy taqyry­by­nyń ózektiligine toqtala otyryp, jańa jahandyq syn-qaterler jaǵda­ıynda BUU Bas hatshysy Antonıý Gýter­­rısh usynǵan jańa qoǵamdyq shart ıdeıa­synyń mańyzdylyǵy arta túske­nine mán berdi. Erlan Qoshanov Qazaq­stan onyń ıdeıasynyń ádilet pen ynty­maq­qa negizdelgen basty qaǵıdattaryn to­lyq qoldaıtynyn, al parlamentter onyń júzege asyrylýynda halyq atynan ókildik etetin ınstıtýt retinde basty ról atqara alady dep esepteıdi.

«Ádilet Prezıdent Qasym-Jomart Toqaevtyń saıası baǵdarynyń ıdeıalyq negizi sanalady. Onyń kóshbasshy­lyǵymen Ádiletti Qazaqstandy qurý­ǵa baǵyttalǵan júıeli saıası jáne ekonomıkalyq reformalar iske asyrylyp jatyr. Bul qoǵamnyń saıasatqa aralasý múmkindigin keńeıtip, áleý­mettik teńsizdikti azaıtty. Inklıý­zııa­ny damytýǵa, densaýlyq saqtaý men bilimniń qoljetimdi bolýyna, ult­tyq baılyqtyń ádiletti bólinýine aıryqsha nazar aýdarylýda. Munyń bári Par­lament qabyldap jatqan zańdarda kórinis taýyp otyr», dedi E.Qoshanov.

Májilis tóraǵasy keıingi otyz jyl ishinde qarjy sektorynyń naqty óndiristi yǵystyryp kele jatqanyn kóptegen halyqaralyq sarapshy atap kórsetip jatqanyna toqtaldy. Bul memlekettiń áleýmettik róliniń tómen­deýine jáne jumysshylar quqyq­tarynyń saqtalýyna keri áserin tıgizdi. Qazaqstanda, kerisinshe, barlyq azamatqa laıyqty eńbek jaǵdaıyn jasap, kásibı ósýdiń teń múmkindikterin qamtamasyz etýge erekshe kóńil bólinedi. Memle­ket basshysy 2025 jyldy «Jumysshy mamandyqtary jyly» dep jarııalady.

Qazaqstan ishki reformalardy belsendi halyqaralyq yntymaqtas­tyqpen ushtastyra otyryp sátti júzege asyryp keledi. Bizdiń el Ortalyq Azııa men Aýǵanstan elderi úshin Ornyqty damý maqsattary boıynsha BUU-nyń óńirlik ortalyǵyn Almaty qalasynda qurý bastamasyn usynǵan edi. Osyǵan oraı Májilis tóraǵasy BUU Bas Assambleıasynyń tıisti qararyn biraýyzdan maquldaǵany úshin atalǵan uıymǵa múshe barlyq elge shynaıy rızashylyǵyn bildirdi.

Ekinshi kúni álemniń joǵary parla­ment­tik delegasııalaryna О́zbek­stan Prezıdenti Shavkat Mırzııoev quttyqtaý sózin arnady. Ol beıbitshilik, demokratııa jáne ornyqty damý ıdeıalaryn álem boıynsha ilgeriletýge qosqan úlesi úshin Parlamentaralyq Odaqtyń rólin erekshe atap ótti.

О́zbekstan basshysy Ortalyq Azııa elderi parlamentteriniń spıkerlerin qabyldap, Assambleıaǵa qatysqandary úshin alǵys aıtty jáne óńirdegi parlamentter arasyndaǵy ózara is-qımyldy kúsheıtý jónindegi basym baǵyttardy talqylady.

Forým aıasynda Erlan Qoshanov sheteldik áriptesterimen birqatar eki jaqty kezdesý ótkizdi. Ol О́zbekstan Respýblıkasynyń Olıı Májilisi Zań shyǵarý palatasynyń spıkeri Nýrıddın Ismoılovpen, Bahreın Koroldiginiń О́kilder keńesiniń spıkeri Ahmed Almýsalammen, Marokko Koroldigi Parlamentiniń Keńesshiler palatasy­nyń tóraǵasy Mohammed Ýld Errashıd­pen, Úndistan Parlamentiniń Halyq palatasynyń tóraǵasy Om Bırlamen parlamentaralyq yntymaqtastyq­ty arttyrý máselelerin talqylady. Taraptar parlamentaralyq dıplomatııa aıasyndaǵy ózara is-áreketti nyǵaıtý, zańnama salasynda tájirıbe almasý joldaryn ortaǵa saldy.

Sondaı-aq Májilis spıkeri forým aıasynda Reseı, Ázerbaıjan, Vetnam, Grýzııa, Túrkııa, Qyrǵyzstan parlamentteriniń tóraǵalarymen ynty­maqtastyqty tereńdetý másele­leri boıynsha pikir almasty.

Tashkentte ótken is-sharaǵa álem­niń 140-tan asa elinen delegat keldi. Qazaqstan depýtattary negizgi sessııadan bólek, beıbitshilik jáne qaýipsizdik, turaqty damý másele­leri komıteti basqosýyna, áıelder par­lamentshileriniń forýmyna, «Eýrazııa» geosaıası tobynyń otyrysyna qatysty.

Qazaqstan Parlamenti Májilisi­niń depýtaty Aıgúl Quspan basqara­tyn Beıbitshilik jáne halyqaralyq qaýip­sizdik máseleleri jónindegi tu­raq­­ty komıtettiń otyrysynda «Pales­tına­da eki memlekettiń qatar ómir súrýi týraly sheshimdi ilgeriletýdegi parlamentterdiń róli» atty qarar jobasy qaraldy.

Jalpy, Parlamentaralyq Odaq – 1889 jyly qurylǵan eń iri halyqaralyq parlamenttik uıym. Oǵan 180 eldiń parlamentteri kiredi. Qazaqstan – 1993 jyldan bastap Parlamentaralyq Odaq Assambleıasyna múshe. Parla­mentaralyq Odaq Assambleıasy parlamenttik dıplomatııaǵa yqpal etedi jáne parlamentter men par­lamentshilerge búkil álemde beıbit saıasatty, demokratııany jáne turaq­ty damýdy ilgeriletý ókilettikterin beredi.